詩篇 75 - 現代台語譯本漢字版(TTVH)-闽南语

亞薩的詩，交互聖樂長；調，用「毋通毀壞」。審判者上帝

1上帝啊，阮感謝你；

阮感謝你，因為你佇阮身邊；

阮欲報揚你奇妙的作為。

2上帝講：佇所定的日子，

我欲照公平審判。

3地及地上的住民攏搖泏的時，

我欲互地的基礎堅固徛在。

4我對驕傲的人講：「毋通驕傲」；

對歹人講：「毋通展威，

5毋通聳鬚，

毋通硬頷頸講大話。」

6人高升毋是對東，毋是對西，

嘛毋是對曠野。

7只有上帝施行審判，

伊互此個降低，互彼個高升。

8上主手裡提杯，

歸杯攏是受氣的厚酒。

伊給酒倒出來；

地上的歹人攏飲，飲到焦。

9毋拘我欲唱歌稱讚雅各的上帝，

欲永遠報揚伊的作為。

10歹人的權勢，伊會斬斷；

義人的氣力，伊會加強。