以西結書 41 - 現代台語譯本漢字版(TTVH)-闽南语

1彼個人導我去到聖殿；伊量壁柱，兩旁的闊攏是三公尺。

2入口的門闊五公尺，門兩旁的壁，此旁兩公尺半，彼旁兩公尺半。伊閣量聖殿，長二十公尺，闊十公尺。

3然後，伊入去內殿。伊量許個壁柱，厚一公尺；入口本身闊三公尺，兩旁的壁闊攏是三公尺半。

4伊閣量內殿，長及闊攏是十公尺。伊給我講：「這是至聖所。」

倚聖殿壁邊的房間

5彼個人量聖殿的壁，厚三公尺。聖殿周圍有廂房，逐間闊兩公尺。

6廂房有三層，一層疊一層，逐層有三十間廂房。聖殿外壁四圍有幫牆，給廂房托啲，才免廂房干焦靠聖殿的壁。

7聖殿周圍的廂房，愈高愈闊。有樓梯通對一樓上到二樓，閣到三樓。聖殿的結構愈高愈闊。

8我閣看見聖殿周圍有高的平台，做廂房的地基；平台三公尺高。

9-10諸個廂房的外壁厚兩公尺半。聖殿的廂房及祭司用的房間中間的四周圍有空地，闊十公尺。

11廂房的門攏向空地；一個門向北，一個門向南。四周圍的空地闊兩公尺半。

西旁的厝

12聖殿西旁彼片空地的後面有一間厝，長四十五公尺，闊三十五公尺，四圍的壁厚兩公尺半。

聖殿的寸尺

13彼個人量聖殿，長五十公尺；對聖殿後壁到空地西旁彼間厝，距離長五十公尺。

14聖殿的頭前，就是東旁的空地，闊五十公尺。

15伊閣量西旁彼間厝，包括兩旁的走廊，長五十公尺。

聖殿的內部

聖殿的內殿、外面的走廊、

16戶橂、窗仔，以及戶橂對面三層的走廊，對土腳到窗仔攏用柴枋包啲。諸個窗仔攏關啲。

17內殿及外埕周圍的壁，對土腳到門的頂面，攏照寸尺用柴枋包啲。

18逐面壁有刻基路伯及棕樹；基路伯及基路伯中間有一欉棕樹；逐個基路伯有兩款面：

19一個面是人的面，向此旁的棕樹；一個面是獅的面，向彼旁的棕樹。聖殿周圍的壁攏仝款。

20按呢，聖殿的壁，對土腳到門的頂面，攏有基路伯及棕樹。

21聖所的門柱是四角的。

木造的祭壇

佇至聖所的頭前有一個

22看起來親像木造的祭壇，高一公尺半，闊一公尺。祭壇的四支角、壇的座、四個面攏是用柴做的。彼個人給我講：「這是下佇上主面前的桌仔。」

門

23聖殿及至聖所的門攏是兩扇的。

24逐扇門各有兩片，是會拗得的。

25聖殿的門扇有刻基路伯及棕樹，及壁柱的雕刻仝款。走廊向外彼面有柴做的棚仔。

26門的走廊兩旁攏有窗仔及棕樹的雕刻。聖殿的廂房及棚仔嘛是按呢。