詩篇 96 - 現代台語譯本漢字版(TTVH)-闽南语

上主是最高統帥(代上 16.23-33)

1著對上主唱新的歌！

全地攏著對上主唱歌！

2著對上主唱歌，稱讚伊的名！

著日日宣布伊拯救的好消息！

3著對萬國宣揚伊的榮耀！

著對萬民講起伊偉大的作為！

4因為上主至大，應該受極大的稱讚；

伊比所有的神明應該閣較受敬畏。

5因為外邦的神明不過是偶像；

毋拘上主創造諸個天。

6尊貴及威嚴包圍伊；

權能及榮光充滿伊的聖所。

7地上萬民攏著稱讚上主！

著將榮耀及權能歸互伊！

8著將上主應得的榮耀歸互伊！

著帶祭物進入伊的埕！

9著穿聖潔做禮服敬拜上主！

全地著佇伊面前驚惶皮皮惙！

10著對萬國宣布：「上主作王！

世界堅固𣍐動搖；

伊欲用公義審判萬民。」

11天著歡喜，地著快樂！

海及彼內面的活物攏著出大聲！

12田園及其中所有的攏著快樂！

彼時，樹林內的樹木攏欲佇上主面前歡喜唱歌。

13上主啲來啦；

伊欲來審判普天下。

伊欲用公義審判世界；

伊欲用信實審判萬民。