詩篇 4 - 現代台語譯本漢字版(TTVH)-闽南语

大闢的詩，交互聖樂長；用弦的樂器伴奏。求上帝幫贊的晚禱

1為我辯護的上帝啊，

我求叫的時，求你應我。

我困苦的時，你有給我解放；

今求你憐憫我，聽我的祈禱。

2恁諸個人啊，恁將我的尊榮變做見笑欲偌久？

恁意愛空虛，追尋虛假，欲到底時？

3著知上主已經分別敬虔的人做伊家己的；

我求叫上主，伊會聽我的聲。

4著驚惶，毋通犯罪；

佇眠床歇睏的時，心著安靜自省。

5著獻合上帝心意的祭；

嘛著倚靠上主。

6真多人啲問：「啥人會當互阮得著福氣？」

上主啊，求你用你面的光照阮。

7你互我心內有歡喜，

贏過人得著真多五穀及新酒。

8我欲安然倒啲睏，

因為只有上主你會互我安穩徛起。