約伯記 42 - 現代台語譯本漢字版(TTVH)-闽南语

1 約伯應上主講：

2我知你逐項攏會；

你的計劃無人會當阻擋。

3你問：「什麼人用無知的話互我的旨意霧霧無明？」

我確實有講家己無了解的話，

諸個代誌真奇妙，我無明白。

4請你聽，我欲講；

我請問你，請給我指示。

5我前曾聽見你，

今我親目看著你。

6所以，我厭惡家己，

坐佇塵埃及火灰頂懺悔。

7上主對約伯講諸個話了後，對提幔人以利法講：「我對你及你兩個朋友發受氣，因為恁議論我，無親像我的僕人約伯所講的赫合理。

8今恁著牽七隻牛，七隻羊，去我的僕人約伯遐，為家己獻燒化祭；我的僕人約伯會替恁祈禱；我會接納伊，才免我照恁的愚戇對待恁，因為恁議論我，無親像我的僕人約伯所講的赫合理。」

9按呢，提幔人以利法、書亞人比勒達、拿瑪人瑣法，照上主命令𪜶的去做；上主就接納約伯的祈禱。

10 約伯替伊的朋友祈禱了後，上主互伊回復過去的繁榮，照伊以前所有的重倍互伊。

11彼時伊的兄弟姊妹，及以前熟似的人攏來看伊，佇伊的厝做夥飲食。𪜶為著上主所降落互伊的災禍悲傷，閣給伊安慰；逐個人送伊一塊銀，一個金環。

12按呢，上主賜福互約伯，互伊的晚景比伊起初較好；伊有羊一萬四千，駱駝六千，牛一千對，驢母一千。

13伊閣有七個子，三個查某子。

14伊給大查某子號名叫做耶米瑪，第二個叫做基洗亞，第三個叫做基蓮‧哈樸

15全地尋無親像約伯的查某子赫呢媠的女子。約伯互諸個查某子及𪜶的兄弟平平得著財產。

16後來約伯閣食一百四十歲，看著伊的子，伊的孫，到四代。

17最後，約伯食長歲壽，年老才死。