1上帝是咱的氣力，著大聲稱讚伊；
著唱歌稱讚雅各的上帝。
2著唱詩歌，搖玲瓏鼓，
彈好聽的琴及瑟。
3著佇初一十五，
咱節期的日，歕哨角。
4因為這是為以色列定的規例，
是雅各的上帝為𪜶設的禮儀。
5伊攻擊埃及地的時，
有及以色列的子民立約。
佇遐我聽見以前毋曾聽著的話。
6上帝講：「我將𪜶肩頭頂的重擔徙開，
互𪜶放落手所捾重的籃仔。
7恁佇患難中求叫，我有解救恁；
我對雷啲彈的密雲中應答恁，
佇米利巴的水泉邊試驗恁。
8我的子民啊，恁著聽，我欲警告恁；
以色列啊，我偌仔呢向望恁聽趁我！
9恁中間毋通有別個神明；
外邦的神明，恁毋通跪拜。
10我是上主 — 恁的上帝；
我曾導恁對埃及地上來。
恁的嘴著大開，我就互恁飽足。
11「毋拘我的子民毋聽我的話；
以色列攏毋插我。
12我就出在𪜶心硬，
互𪜶照家己所愛去做。
13我偌仔呢向望我的子民聽趁我，
以色列肯行我的路！
14我真緊就會制壓𪜶的對敵，
用手倒抉攻擊𪜶的敵人。
15怨恨上主的人會佇伊面前衰退；
𪜶會永遠受刑罰。
16上主欲用好的麥互以色列食，
用對石磐出的蜜互𪜶滿足。」
Who We AreWhat We EelieveWhat We Do
2025 by iamachristian.org,Inc All rights reserved.
