1你哪毋拆裂天降落來？
你一下出現眾山就搖動，
2親像火點𤏸焦柴，
親像火給水燃滾。
願敵人識你的名，
萬國佇你的面前皮皮惙。
3你曾做阮料想𣍐到，通驚畏的代誌，
彼時你降臨，眾山攏搖泏。
4對古早以來，人毋曾聽過，
耳孔毋曾聽著，
目睭嘛毋曾看見你以外有上帝
會當為著聽候伊的人做代誌。
5你歡喜接納行為正直的人，
就是許個會記得你，遵趁你道路的人。
毋拘你受氣，因為阮犯罪；
此款情形已經真久，阮哪會得救？
6阮親像一個無清氣的人；
阮一切義的行為親像一領垃屑衫。
阮攏親像樹葉凋去，
阮的罪過親像風給阮吹走。
7無人求叫你的名，
無人給你扭牢牢；
因為你面越走毋看阮，
將阮放互阮的罪管轄。
8毋拘，上主啊，你猶原是阮的老父。
阮是黏土，你是燒瓷師傅；
阮攏是你親手造的。
9上主啊，毋通對阮發大受氣；
毋通永遠記牢阮的罪過。
看咧，阮攏是你的子民，求你看顧。
10你聖的城市已經變做曠野；
錫安已經變做荒埔；
耶路撒冷已經荒廢。
11阮神聖閣媠的殿，
阮的祖先稱讚你的所在，
攏互火燒了了；
阮欣慕的好所在攏毀壞啦。
12上主啊，經過諸個代誌，你豈猶忍會牢？
你豈會佯恬恬，互阮受大苦難？
Who We AreWhat We EelieveWhat We Do
2025 by iamachristian.org,Inc All rights reserved.
