希伯來書 3 - 現代台語譯本漢字版(TTVH)-闽南语

耶穌超越摩西

1所以，恁同受上帝選召聖的兄弟姊妹，恁著想咱所宣認彼位作使者，作大祭司的耶穌。

2伊對指派伊的上帝盡忠，抵及摩西佇上帝的家盡忠仝款。

3起厝的人比伊起的厝較尊貴；按呢，耶穌比摩西應該受閣較大的榮光。

4所有的厝攏是人起的，毋拘起造萬物的是上帝。

5摩西作僕人，對上帝的全家盡忠，為著上帝後來所欲講的話作證；

6毋拘，基督作子治理上帝的家。對所向望的，咱若用確信及勇氣來持守，咱就是上帝家內的人。

上帝子民的安歇

7所以，照聖神所講：

今仔日恁若聽上帝的聲，

8毋通硬心，親像恁的祖先佇背逆的時，

佇曠野試探伊的日。

9上帝講：

恁的祖先雖然有看著我的作為，

𪜶猶原佇遐試探我，考驗我

10四十年久。

所以，我對彼世代的人受氣，講：

𪜶的心失迷；

𪜶毋識我的道路。

11我佇受氣中立誓，講：

𪜶絕對𣍐當進入我所賜的安歇。

12兄弟姊妹，恁著注意，才免恁中間有人心邪惡毋信，致到離開永活的上帝。

13著趁猶有彼個叫做「今仔日」的時，日日相勸勉，恁中間才免有人受罪惡迷惑致到硬心。

14咱若堅守當初的確信到路尾，就成做基督的同工。

15聖經按呢講：

今仔日恁若聽上帝的聲，

毋通硬心，親像恁的祖先佇背逆的時按呢。

16聽見上帝的聲猶久背逆伊的是什麼人？豈毋是許個摩西對埃及導出來所有的人？

17上帝佇彼四十年久對什麼人發受氣？豈毋是許個因為犯罪死佇曠野的人？

18許個背逆的人以外，上帝豈曾對人立誓講，𪜶𣍐當進入伊所賜的安歇？

19按呢，𪜶𣍐當進入安歇是因為𪜶毋信。