詩篇 30 - 現代台語譯本漢字版(TTVH)-闽南语

大闢的詩，獻聖殿抑是宮殿的歌。感恩的詩

1上主啊，我欲尊你做至高，

因為你有提拔我，無互我的對敵對我誇口。

2上主 — 我的上帝啊，

我求叫你，你有醫好我。

3上主啊，你對陰府給我扭出來；

你互我活啲，免入墓壙孔。

4上主聖的子民啊，恁著唱歌謳咾伊，

稱讚伊的聖名。

5伊的受氣只有一時仔久；

伊的恩典到一世人。

雖然歸暝有啼哭，

天一下光就有歡喜。

6佇我順利的時，我曾講：

「我永遠𣍐動搖。」

7上主啊，你施恩，互我親像山徛在在；

你面越走毋看我，我就驚惶。

8上主啊，我求叫你；

我對上主求憐憫，講：

9「我死，入墓，有啥利益？

土粉豈會稱讚你，豈會報揚你的信實？」

10上主啊，求你聽我，憐憫我；

上主啊，求你幫贊我。

11你有將我的啼哭變做跳舞，

將我的麻衫褪起來，用歡喜做帶給我縖。

12按呢我的心神就𣍐恬恬，會唱歌稱讚你；

上主 — 我的上帝啊，我欲永遠感謝你。