約拿書 1 - 現代台語譯本漢字版(TTVH)-闽南语

約拿違背上主

1上主對亞米太的子約拿講：

2「你去，去尼尼微彼個大城，出聲警戒𪜶；因為𪜶的邪惡我有看著。」

3毋拘約拿想欲走去他施閃避上主。伊落去約帕，抵著一隻船欲去他施，就納船費，坐彼隻船及人去他施，閃避上主。

4毋拘上主互海起大風，風湧真大，船強欲破去。

5船員真驚，逐個人哀求家己的神明，閣將船內的貨物㧒落海，互船較輕。毋拘約拿已經落去船肚底，倒啲，睏甲真落眠。

6船長行倚去，給約拿講：「你哪赫好睏？起來求叫你的神明；伊豈採會給咱保庇，互咱免死。」

7眾人講來講去：「來，來抽籤，看是啥人惹起此個災禍。」𪜶就抽籤，抽著約拿。

8𪜶問伊講：「你給阮講，你是按怎引起此個災禍？你是食什麼頭路？你叨位來？是叨一國，叨一族的？」

9伊應講：「我是希伯來人；我敬畏上主 — 天頂的上帝，伊是創造大海及陸地的。」

10許個人非常著驚，對伊講：「你到底有做什麼代誌？」

許個人知約拿啲閃避上主，因為伊有給𪜶講。

11𪜶就問伊：「阮著按怎對待你，才會互海平靜？」因為海湧愈來愈大。

12伊給𪜶講：「恁給我掠起來㧒落海，海就會平靜；我知恁抵著此個大風是因為我的緣故。」

13雖然約拿按呢講，船員猶久盡力欲給船划倚岸，毋拘無法度，因為海湧愈起愈大。

14𪜶就求叫上主，講：「上主啊，阮迫切求你，毋通因為阮互此個人死，煞害阮無命；毋通給阮責罰，講阮流無辜的人的血。上主啊，這一切攏是照你的意思做。」

15𪜶就給約拿掠起來㧒落海；海的風湧就平靜。

16許個人就大大敬畏上主，獻祭互上主，閣下願。

17上主安排一尾大魚給約拿吞落去；約拿佇魚的腹肚內三暝三日。