詩篇 86 - 現代台語譯本漢字版(TTVH)-闽南语

大闢的祈禱。求主施恩保護

1上主啊，求你俯耳孔聽我，應我，

因為我困苦散赤。

2求你保存我的性命，因為我信靠你。

我的上帝啊，你的僕人倚靠你；求你拯救我。

3主啊，求你憐憫我，

因為我歸日求叫你。

4主啊，求你互你的僕人心神歡喜，

因為我仰望你，對你祈禱。

5主啊，你良善，歡喜赦免；

你賜豐盛的慈愛互所有求叫你的人。

6上主啊，求你俯耳孔聽我的祈禱，

俯落聽我懇求的聲。

7我佇患難的日求叫你，

因為你會應我。

8主啊，諸個神明無一個會當及你相比；

𪜶的所做嘛𣍐當及你比。

9主啊，你所造的萬民攏會來到你的面前仆拜；

𪜶會榮耀你的名。

10因為你偉大，做奇妙的事；

只有你是上帝。

11上主啊，求你將你的道路指示我，

我欲照你的真理來行；

求你互我用專一的心敬畏你的名。

12主 — 我的上帝啊，我欲全心稱讚你；

我欲永遠榮耀你的名。

13你施落互我的慈愛赫呢大，

有救我的性命免落陰府上深的所在。

14上帝啊，驕傲的人起來攻擊我；

歸陣強暴的人數想我的性命；

𪜶無將你囥佇眼中。

15主啊，你是仁慈恩典的上帝，

無快受氣，閣有豐盛的慈愛及信實。

16求你越過來看我，可憐我，

將你的氣力賜互你的僕人，

救你女婢的子。

17求你顯示恩待我的證據，

互怨恨我的人看著來見笑，

因為上主你有幫贊我，安慰我。