歷代志上卷 14 - 現代台語譯本漢字版(TTVH)-闽南语

大闢佇耶路撒冷的活動(撒下 5.11-16)

1 泰爾王希蘭派使者帶柏香柴，及土水師傅、作木師傅去大闢遐，給大闢起宮殿。

2大闢就知上主堅立伊做以色列王，閣為著上主的子民以色列互伊的國強盛。

3 大闢佇耶路撒冷閣娶幾若個某。大闢閣生後生及查某子。

4佇耶路撒冷生的子是沙慕亞、朔罷、拿單、所羅門、

5益轄、以利書亞、以利法列、

6挪迦、尼斐、雅非亞、

7以利沙瑪、比利雅大、以利法列。

刣贏非利士人(撒下 5.17-25)

8 非利士人聽著大闢受抹油選立做全以色列的王，就全力上來追尋大闢。大闢聽著就出去迎戰。

9非利士人來侵犯利乏音山谷。

10大闢問上帝講：「我豈通進攻非利士人？你豈欲將𪜶交佇我的手？」

上主給大闢講：「你去，我會將𪜶交佇你的手。」

11 非利士人上來巴力‧比拉心，大闢佇遐給𪜶拍敗；大闢講：「上帝用我的手衝散我的對敵，親像大水給堤岸沖破。」因為按呢，彼個所在就叫做巴力‧比拉心。

12非利士人給𪜶的偶像擲佇遐；大闢命令人給許個偶像放火燒。

13 非利士人閣來侵犯利乏音山谷。

14大闢問上帝。上帝給伊講：「毋通正面進攻；著踅過𪜶的後面，佇桑材樹林的頭前給𪜶攻擊。

15你聽著樹尾有行軍的聲，就著出兵進攻，因為上帝已經佇你的頭前攻擊非利士人的軍隊。」

16大闢就照上帝的命令去做，對基遍攻擊非利士人的軍隊，直到基色。

17大闢的名聲傳到萬國；上主互列國攏驚伊。