約書亞記 11 - 現代台語譯本漢字版(TTVH)-闽南语

拍敗北旁的聯軍

1 夏瑣王耶賓聽著此個代誌，就派人去見瑪頓王約巴、伸崙王，及押煞王；

2閣到北旁的山區，加利利湖南旁的亞拉巴山谷、山埔，及西旁多珥的山地，見許個王。

3伊閣去見約旦河東旁及西旁的迦南人，以及住佇山區的亞摩利人、赫人、比利洗人，及耶布斯人，以及黑門山腳米斯巴地的希未人。

4諸個王及𪜶的軍兵攏出來，人額多甲親像海邊的沙；閣有真多戰馬及戰車。

5𪜶攏來米倫溪邊聚集，做夥紮營，欲及以色列人交戰。

6上主給約書亞講：「毋免驚𪜶。明仔載差不多此個時，我欲將𪜶攏交互以色列人，給𪜶刣死。你著斬斷𪜶的馬的腳筋，用火燒𪜶的戰車。」

7約書亞及攏總的戰士來到米倫溪邊，給𪜶突擊。

8上主將𪜶交佇以色列人的手。以色列人攻擊𪜶，給𪜶趇到西頓大城，到米斯利弗‧瑪音，直到東旁的米斯巴平原，刣死𪜶，連一個都無留啲。

9約書亞就照上主的命令對待𪜶，斬斷𪜶的馬的腳筋，用火燒𪜶的戰車。

10後來，約書亞越轉來攻取夏瑣，用刀刣死夏瑣的王；過去，夏瑣是諸個國的頭。

11以色列人用刀刣死彼城內的住民，徹底給𪜶剿滅；所有會喘氣的無留一個活啲，閣放火燒夏瑣。

12 約書亞征服所有的城，掠𪜶的王，用刀刣死𪜶，徹底給𪜶剿滅，是照上主的僕人摩西所命令的。

13許個起佇山崙仔頂的城，夏瑣以外，以色列人無給𪜶放火燒；只有夏瑣互約書亞燒去。

14以色列人對許個城搶的物及牲生，攏取做家己的；毋拘𪜶用刀刣死所有的人，會喘氣的連一個都無留啲。

15上主按怎命令伊的僕人摩西，摩西照按呢命令約書亞，約書亞就照按呢做；上主命令摩西的，約書亞無一項無照按呢做。

約書亞佔領的土地

16按呢，約書亞佔領彼個地區，包括山區、南旁全地、歌珊全地及山埔、亞拉巴山谷、以色列的山地及平原；

17對西珥的哈拉山，上到黑門山腳黎巴嫩山谷的巴力‧迦得，閣掠彼地區所有的王，給𪜶刣死。

18約書亞及諸個王交戰真久；

19基遍的希未人以外，無一個城及以色列人定和平條約，所以以色列人用武力佔領諸個地。

20因為上主互許個城的人心硬，及以色列人交戰，互𪜶受剿滅，無受憐憫；照上主命令摩西的話，𪜶攏完全受消滅。

21後來，約書亞消滅住佇希伯崙、底璧，及亞拿伯山區，以及猶大及以色列山區的亞衲人；約書亞將𪜶及𪜶的城攏毀滅。

22佇以色列人徛起的所在，亞衲族的人，連一個都無留啲，毋拘佇迦薩、迦特，及亞實突猶有賰一寡。

23按呢，約書亞征服彼個全地，抵照上主應允摩西的話；閣將彼個地分互以色列逐支族、逐宗族做家業。對按呢，全境太平，無閣有戰爭。