詩篇 97 - 現代台語譯本漢字版(TTVH)-闽南语

至高的統治者上主

1上主作王，大地著快樂；

眾海島著歡喜。

2密雲及烏暗佇伊的四圍；

公義及正直是伊寶座的地基。

3火行佇伊的面前，

燒伊四圍的對敵。

4伊的熠爁照光世界；

大地看見就搖泏。

5佇上主 — 全地的主面前，

眾山親像蠟消熔。

6天宣布伊的公義；

列邦看見伊的榮光。

7所有服事雕刻的偶像，

用虛假的神明來誇口的人攏會見笑失敗。

眾神明啊，恁攏著敬拜上主。

8上主啊，因為你的審判，

錫安聽見就歡喜，

猶大的城嘛攏快樂。

9因為上主你至高，𨃟過全地；

你至尊超越眾神明。

10上主所疼的人怨恨歹。

伊保護伊聖的子民的性命，

救𪜶脫離歹人的手。

11光為著義人出現；

喜樂為著心正直的人準備。

12義人啊，著因為上主歡喜，

稱讚伊的聖名。