傳道書 9 - 現代台語譯本漢字版(TTVH)-闽南语

1我將這一切的代誌囥佇心內詳細想，就知義的人及智慧的人，以及𪜶的一舉一動，連疼及恨，攏佇上帝的手內，人𣍐當代先知。

2眾人的命運攏仝款：義人及邪惡的人，好人及歹人，清氣的人及無清氣的人，獻祭的人及無獻祭的人，攏像款；好人按怎，罪人嘛按呢；咒誓的人按怎，毋敢咒誓的人嘛按呢。

3佇日光的下面所發生一切的代誌，有一項不幸，就是眾人的遭遇攏仝款；世間人的心充滿邪惡，活的時心內癲狂，最後攏著死。

4人猶啲活就有向望，因為活的狗比死的獅較好。

5活啲的人知𪜶會死；死的人什麼都毋知，嘛𣍐閣得著報賞；𪜶的名無人會記得。

6𪜶的疼，𪜶的恨，𪜶的怨妒，攏已經消失。佇日光的下面所發生一切的代誌，永遠無𪜶的份。

7做你去，歡喜食你的飯，快樂飲你的酒，因為上帝已經接納你的所做。

8你著不時穿媠的衫；頭殼著常常抹油。

9佇你一生空虛的日子，就是上帝賜你佇日光的下面空虛的日子，著及你所疼的某快樂過日；因為彼是你在生，佇日光的下面拍拼所得著的福分。

10你的手應該做的代誌著盡力去做，因為佇你欲去的陰間無工作，無計劃，無學識，嘛無智慧。

11我閣看著佇日光的下面，𠢕走的無一定會先到，有力的無一定會較贏，聰明的無一定會得著米糧，明理的無一定會好額，有學識的無一定受看重；𪜶所抵著的攏在佇時及機會。

12人的時家己毋知，親像魚不幸互網網著，鳥互羅網當著，災禍忽然到的時，世間人陷落彼內面嘛是按呢。

智慧贏過愚戇

13我看著日光的下面有一項智慧，照我觀察真特別。

14有一個真細的城，彼內面人真少；有一個強的王來攻擊，圍困，閣起高的土堆給伊攻擊。

15城內有一個散赤卻有智慧的人，有用伊的智慧救彼個城；後來無人記得伊。

16我講：「智慧贏過氣力。」總是散赤人的智慧煞互人看輕，伊的話無受重視。

17智慧的人輕輕仔講的話，比戇人的頭目大聲嚷較有人聽。

18智慧贏過交戰的武器；總是一遍失錯會破壞真多好事。