詩篇 59 - 現代台語譯本漢字版(TTVH)-闽南语

掃羅派人去大闢的厝埋伏欲刣伊的時，大闢做此首金詩，交互聖樂長；調，用「毋通毀壞」。祈求上帝保祐

1我的上帝啊，求你救我脫離我的對敵，

給我安置佇高的所在，互我脫離起來攻擊我的人。

2求你救我脫離作歹的人，

救我脫離愛害人性命的人。

3𪜶埋伏欲害我的性命；

兇惡的人聚集來攻擊我，

毋拘上主啊，這毋是因為我的過失抑是罪過。

4我雖然無過失，𪜶衝來欲害我。

緊起來，看我的困境來幫贊我！

5上主 — 萬軍的統帥上帝啊，

緊起來處罰敵對你的列邦！

以色列的上帝啊，毋通寬赦所有奸詐的歹人。

6𪜶暗時倒來，親像狗啲吠，

佇城內行來行去。

7𪜶的嘴吐出的話親像利的刀；

𪜶想：「豈有人啲聽？」

8毋拘上主你欲笑𪜶；

你欲恥笑列邦。

9上帝 — 我的氣力啊，我欲仰望你，

因為你是我的堡壘。

10我的上帝會用慈愛款待我；

上帝會互我看見對敵受報應。

11毋通剿滅𪜶，才免我的子民𣍐記得。

主 — 阮的盾牌啊，求你用你的氣力互𪜶四界流浪閣失勢。

12𪜶因為嘴犯的罪及嘴唇講的話，

會跋落家己的驕傲所設的陷阱。

因為𪜶所講的咒罵及白賊，

13求你發受氣剿滅𪜶，給𪜶徹底消滅，

互人攏知上帝啲掌管以色列，

甚至到天邊海角。

14𪜶暗時倒來，親像狗啲吠，

佇城內行來行去。

15𪜶走來走去尋食，

食無飽就歸暝吠無停。

16毋拘我欲唱歌稱讚你的氣力，

早起時欲大聲謳咾你的慈愛；

因為你是我的堡壘，

佇患難的日做我避難的所在。

17上帝 — 我的氣力啊，我欲唱歌稱讚你，

因為你是我的堡壘，是永遠疼我的上帝。