詩篇 58 - 現代台語譯本漢字版(TTVH)-闽南语

大闢的金詩，交互聖樂長；調，用「毋通毀壞」。求上帝刑罰作歹的人

1執政者，恁豈有真正啲講公義？

豈有照公平審判人？

2無，恁心內計劃做歹代誌，

佇地上，恁用手對人施強暴。

3歹人對出母胎就行迷路；

一下離開老母的腹肚就行偏路，講白賊。

4𪜶的毒親像蛇的毒；

𪜶親像毒蛇塞密家己的耳孔，

5毋聽弄蛇的人，

抑是𠢕唸咒的人的聲。

6上帝啊，求你拍折𪜶的嘴齒；

上主啊，求你摃斷猛獅的大支牙齒。

7願𪜶消失親像水流了了，

親像草受踐踏焦去。

8願𪜶親像露螺趖過的跡連鞭無去；

親像婦仁人流產的胎無見著天日。

9恁用刺仔燃火，鼎猶未熱，

伊欲用捲螺仔風，將霑的及焦的做一下掃去。

10義人看見𪜶受報應就歡喜；

伊用歹人流的血洗腳。

11人就講，義人真正有好報；

佇地面上上帝果然有啲審判。