以賽亞書 7 - 現代台語譯本漢字版(TTVH)-闽南语

互亞哈斯的信息

1 烏西亞的孫，約坦的子，亞哈斯做猶大王的時，敘利亞王利汛及利瑪利的子以色列王比加進軍攻擊耶路撒冷，毋拘攻𣍐破。

2有人給大闢家講，敘利亞及以法蓮

聯盟；亞哈斯的心及人民的心攏驚惶皮皮惙，親像樹林內的樹互大風吹振動。

3上主對以賽亞講：「你及你的子施亞雅述

出去迎接亞哈斯，佇上池的水溝口，迵到漂布場的大路見伊，

4給伊講：『著謹慎，著鎮靜，毋免驚。毋通為著此兩支啲淐煙的火把，就是啲大發受氣的利汛及𪜶敘利亞人，以及利瑪利的子，來驚惶失膽。

5因為敘利亞及以法蓮，以及利瑪利的子計謀攻擊你，講：

6阮欲上去攻擊猶大，侵佔，征服伊；阮欲設立他比勒的子作王。

7所以，至高的上主按呢講：

此個代誌𣍐成功，

一定𣍐實現，

8-9因為敘利亞的首都是大馬士革，

大馬士革的首領是利汛；

以法蓮的首都是撒馬利亞，

撒馬利亞的首領是利瑪利的子。

(六十五年內以法蓮一定滅亡。)

恁的信心若無在，恁絕對徛𣍐穩。』」

以馬內利的記號

10上主閣對亞哈斯講：

11「著對上主 — 你的上帝求一個記號，無論對上低的深淵抑是上高的天頂來」。

12毋拘亞哈斯回答：「毋，我毋求，我無欲試探上主。」

13先知就講：「大闢家啊，著聽！恁互人厭惡，豈算小可事？恁豈嘛欲互我的上帝厭惡？

14因為按呢，主欲親自互恁一個記號：看咧，有一個少年女子會懷孕生子；伊欲叫做『以馬內利』。

15到伊學會曉拒絕惡，選擇善的時，伊欲有起司及芳蜜通食。

16因為此個囝仔會曉拒絕惡，選擇善以前，恁所啲驚彼兩個王的國土攏會徹底荒廢。

17上主會互亞述王帶來的患難臨到你、你的人民，及恁老父的家；這是以法蓮對猶大分裂以來毋曾有的患難！

18「佇彼日上主會發令，對尼羅河的源頭召集胡蠅，閣對亞述地召集蜜蜂來。

19𪜶攏會飛來歇佇崎的山谷、石壁縫，以及一切的莿及草埔。

20「彼時，亞述王親像主對幼發拉底河對岸租來的剃頭刀，主欲用伊給恁的頭毛及腳毛，甚至恁的嘴鬚攏剃掉。

21「彼時，一個人會飼一隻母的牛仔，兩隻母的綿羊；

22因為有充足的奶，國內所有賰落來的人攏會當食起司及芳蜜。

23「彼時，種一千欉葡萄，值銀一千的所在，攏會發莿雜草。

24人著帶箭及弓才敢去遐；因為所有的土地攏互莿雜草蓋滿。

25所有用鋤頭種作過的山地，因為有雜草莿，人毋敢閣去，變做放牛去食草，出在羊踐踏的所在。」