雅各書 2 - 現代台語譯本漢字版(TTVH)-闽南语

毋通有偏見

1我的兄弟姊妹，既然恁信咱榮光的主耶穌基督，著毋通用外表對待人。

2若有一個掛金手指，穿媠衫的好額人入來恁的會堂，閣有一個穿破衫的散赤人入來，

3恁干焦注意彼個穿媠衫的，對伊講「請來坐大位」，對彼個散赤人講「你徛𫢶遐」，抑是講「坐我的腳砧邊」，

4按呢恁豈毋是偏心，用歹的動機啲判斷人？

5親愛的兄弟姊妹，著聽！上帝有揀選世間的散赤人，互𪜶佇信仰上富足，通承接伊應允互疼伊的人的國度。

6毋拘恁侮辱散赤人！壓迫恁，拖恁上法庭的，豈毋是許個好額人？

7𪜶才是誹謗恁所領受尊貴的名許個人！

8恁若遵趁聖經所記載「著疼厝邊親像疼家己」彼個上帝國的律法，按呢就著。

9毋拘恁若看外表對待人就是犯罪，受律法判做犯法。

10人若無守律法中的一條誡命，就是無守全部的律法。

11因為彼位命令「毋通犯姦淫」的，嘛講「毋通害死人」。雖然你無犯姦淫，你若害死人就是違犯律法。

12既然恁啲欲受互人自由的律法審判，著照律法的要求講話，做代誌。

13因為，無用慈悲對待人的，佇審判的時，上帝𣍐用慈悲對待伊；慈悲贏過審判。

信心及行為

14兄弟姊妹，若有人講伊有信，毋拘無用行為來證明，有啥路用？彼款的信豈會救伊？

15恁中間若有兄弟抑是姊妹無衫通穿，三頓無通食，

16恁干焦對𪜶講：「祝恁平安，著穿互燒，食互飽！」毋拘無供給𪜶肉體所需要的物，有啥路用？

17所以，只有信心，若無行為，是死的。

18毋拘有人欲講：「你有信心，我有行為；請你互我看無行為的信心，我就用行為互你看我的信心。」

19你信上帝只有一位，按呢真著；連鬼嘛信，甚至驚甲皮皮惙。

20你哪𣍐曉想，你愛欲知無？無行為的信心無路用。

21咱的祖先亞伯拉罕獻家己的子以撒佇祭壇頂，豈毋是對此個行為互上帝給伊稱做義人？

22可見，信心及伊的行為做夥運作；信心通過行為才完整。

23這是應驗聖經所講：「亞伯拉罕信上帝，因為按呢，上帝就給伊算做義」；伊嘛稱做上帝的朋友。

24可見，人受接納做義人是對行為，毋是干焦對信。

25妓女喇合的情形嘛是按呢。伊接納以色列人的使者，幫贊𪜶對別條路逃走，按呢伊豈毋是對行為受接納做義人？

26身軀無氣是死的；信心無行為嘛是死的。