1禮拜日透早，天欲光的時，許個婦仁人帶𪜶所準備的芳料去墓地。
2𪜶看著石頭已經對墓翱開，
3就入去，毋拘尋無主耶穌的遺體。
4𪜶為著此項代誌愣去毋知欲按怎的時，忽然有兩個人穿光映映的衫徛佇𪜶身邊。
5諸個婦仁人非常著驚，面仆落土腳。彼兩個人給𪜶講：「恁是按怎佇死人的中間啲尋活人？伊無佇遮，伊已經閣活。
6恁著會記得伊猶佇加利利的時給恁講的話：
7『人子一定會受出賣佇罪人的手，互𪜶釘十字架，第三日閣活。』」
8許個婦仁人就想著耶穌的話。
9𪜶離開墓轉去，將諸個代誌攏對十一個使徒及其他攏總的人報告。
10對使徒報告諸個代誌的，就是末大拉的馬利亞、約亞娜、雅各的老母馬利亞，以及其他及𪜶做陣的婦仁人。
11使徒想講諸個婦仁人所講的話無影無跡，所以無相信。
12毋拘彼得起來，走去墓裡，俯落去看，只有看著幼麻布若定。伊就轉去，對所發生的代誌感覺真奇怪。
佇以馬忤斯的路中(可 16.12-13)13像彼日，門徒中有兩個人欲去一個庄頭，叫做以馬忤斯，此個所在離耶路撒冷約十一公里。
14𪜶佇路中互相啲談論所發生攏總的代誌。
15𪜶談論來談論去的時，耶穌親身行倚來及𪜶做陣行。
16𪜶看著，毋拘𣍐認得。
17耶穌問𪜶：「恁那行那啲議論的是什麼代誌？」
𪜶就停落來，滿面憂愁。
18其中有一個人叫做革流巴應伊講：「此幾日佇耶路撒冷所發生的代誌，對外地來住佇耶路撒冷的人，是按怎干焦你一個毋知？」
19耶穌問𪜶：「什麼代誌？」
𪜶給伊講：「拿撒勒人耶穌的代誌。伊是先知，佇上帝及眾人的面前，無論講話抑是做代誌攏真有權能。
20阮的祭司長及領袖給伊送去互人判死刑，釘十字架。
21伊就是阮所啲期待欲來拯救以色列彼位。毋若按呢，此個代誌發生到今仔日已經第三日啦。
22閣阮中間有幾若個婦仁人互阮真著驚。𪜶天昲光就到墓裡，
23毋拘尋無耶穌的遺體。𪜶轉來報告講有看著天使出現，給𪜶講伊閣活啦。
24阮中間嘛有幾若個人去墓裡，看著的代誌逐項及婦仁人所講的攏像款，𪜶嘛無看著耶穌。」
25耶穌就對𪜶講：「唉啊，恁哪即呢戇，心哪即呢鈍，𣍐相信先知所講一切的話！
26基督豈毋是應該著受諸個苦難才來入伊的榮光？」
27耶穌就對摩西及眾先知起，給𪜶解說聖經中所有關係伊本身的記載。
28𪜶啲欲到所欲去彼個庄頭，耶穌若親像欲繼續行，
29不過𪜶兩個強強給伊留，講：「日頭已經落山，天暗啦，請及阮住。」
耶穌就入去及𪜶住。
30耶穌及𪜶坐桌的時，提餅感謝，然後擘開，分互𪜶。
31𪜶的目睭開，認著伊；伊忽然對𪜶面前消失。
32𪜶就互相講：「伊佇路中及咱講話，給咱說明聖經的時，咱的心豈無親像火啲𤏸？」
33𪜶隨時出發，倒轉去耶路撒冷，看著彼十一個使徒及其他的人聚集佇遐，
34啲講：「主真正閣活啦！伊已經有出現互西門看。」
35彼兩個人就將佇路中所發生的代誌，及耶穌啲擘餅的時𪜶才認著伊的經過，攏給𪜶講。
耶穌對門徒顯現(太 28.16-20；可 16.14-18；約 20.19-23；徒 1.6-8)36彼兩個門徒啲講諸個代誌的時，耶穌親身徛佇𪜶中間，對𪜶講：「願恁平安！」
37𪜶亦驚亦惙，想講是看著鬼。
38耶穌給𪜶講：「恁是按怎不安，心內哪會啲憢疑？
39看我的手，我的腳；確實是我。恁摸就知，因為鬼無骨無肉；摸看覓咧，我攏有！」
40伊講了就將伊的腳及手伸互𪜶看。
41𪜶歡喜甲毋敢相信，猶感覺奇怪的時，耶穌問𪜶：「恁遮有什麼通食無？」
42𪜶提一尾烘好的魚互伊，
43伊就佇𪜶的面前接去食。
44後來耶穌給𪜶講：「摩西的律法及先知的冊，以及詩篇記載關係我的代誌，一定著應驗。諸個話我猶及恁做夥的時已經有給恁講啦。」
45耶穌就開𪜶的心竅，互𪜶明白聖經，
46對𪜶講：「聖經有按呢記載：基督著受苦難，第三日對死人中閣活，
47閣恁著奉伊的名傳悔改來得著赦罪的道理，對耶路撒冷起，傳到萬國。
48恁就是諸個代誌的見證人。
49我將我的父所應允的交互恁；著佇此個城聽候，到恁得著對頂面來的能力。」
耶穌上天(可 16.19-20；徒 1.9-11)50耶穌導𪜶出去，一直到伯大尼，然後攑雙手給𪜶祝福。
51伊啲給𪜶祝福的時離開𪜶，受接上天。
52𪜶就給伊拜，然後歡歡喜喜轉去耶路撒冷，
53繼續佇聖殿稱讚上帝。
Who We AreWhat We EelieveWhat We Do
2025 by iamachristian.org,Inc All rights reserved.
