以賽亞書 27 - 現代台語譯本漢字版(TTVH)-闽南语

1佇彼日，上主欲用伊碇閣利的大支劍刑罰彼隻海獸，就是旋來旋去趖真緊的蛇，閣欲刣死彼隻海怪。

2佇彼日，著為著出好酒的葡萄園來歡喜唱歌：

3我上主是顧守葡萄園的；

我不時給伊沃水。

我暝日攏啲顧守，

才免有人給伊損壞。

4我無閣對葡萄園受氣；

園內若有莿野草，

我會進前給𪜶刜，

給𪜶燒了了。

5許個對敵若無愛按呢，著歸向我，

受我保護，及我和好；

𪜶著及我和好。

6將來，以色列會釘根，

雅各會茁芽開花，

𪜶的果子會遍滿全世界。

7上主拍以色列，

無親像伊拍許個攻擊𪜶的赫呢嚴重；

伊殺害𪜶，

無親像伊殺害許個屠殺𪜶的赫呢厲害。

8上主放逐𪜶，趕散𪜶，

用按呢刑罰𪜶；

伊佇透東風的日，

用強烈的風吹散𪜶。

9 以色列若拍碎外邦神明祭壇的石，

無閣有亞舍拉女神的柱像及香台，

𪜶的罪過就得著赦免，

𪜶的罪得著解除。

10若無，堅固的城市會變荒埔，

親像曠野無人徛起；

佇遐賰牛啲歇睏，啲食草，

會給所有樹枝的葉食了了。

11樹枝一下枯焦斷去，查某人就拾去燃火。

因為𪜶是完全無知的子民，

所以造𪜶的無欲憐憫𪜶，

𪜶的創造主無欲施恩互𪜶。

12佇彼日，對幼發拉底河到埃及的溪谷，上主會親像收成果子按呢，給恁 — 以色列的人民一個一個聚集起來。

13佇彼日，大支哨角會彈，許個流亡佇亞述地及埃及地的以色列人會倒轉來。𪜶攏欲佇耶路撒冷的聖山敬拜上主。