以斯拉記 7 - 現代台語譯本漢字版(TTVH)-闽南语

以斯拉到耶路撒冷

1諸個事以後，波斯皇帝亞達薛西坐位的時，以斯拉對巴比倫轉來；伊是西萊雅的子，西萊雅是亞撒利雅的子，亞撒利雅是希勒家的子，

2希勒家是沙龍的子，沙龍是撒督的子，撒督是亞希突的子，

3亞希突是亞瑪利雅的子，亞瑪利雅是亞撒利雅的子，亞撒利雅是米拉約的子，

4米拉約是西拉希雅的子，西拉希雅是烏西的子，烏西是布基的子，

5布基是亞比書的子，亞比書是非尼哈的子，非尼哈是以利亞撒的子，以利亞撒是大祭司亞倫的子。

6 以斯拉對巴比倫上來；伊是經學教師，對上主 — 以色列的上帝所賞賜摩西的律法非常精通。因為上主 — 伊的上帝賜福互伊，伊對皇帝的請求，攏得著允准。

7亞達薛西作王第七年，有一寡以色列人、祭司及利未人、獻詩的、聖殿守衛、聖殿的工人，轉來耶路撒冷。

8彼年的五月，以斯拉轉來到耶路撒冷；

9正月初一，伊對巴比倫起身，五月初一就到耶路撒冷，因為伊的上帝施恩的手幫贊伊。

10以斯拉專心研究閣實行上主的律法，將規例命令教導以色列人。

亞達薛西互以斯拉的文件

11祭司以斯拉是經學教師，精通上主互以色列的誡命及規例。下面是亞達薛西王互以斯拉的詔書：

12列王的王亞達薛西寫互祭司以斯拉，精通天頂上帝律法的經學教師，願你平安。

13我國內的以色列人、祭司及利未人，若有人願意轉去耶路撒冷，我下令，允准𪜶及你做夥去；

14我及七個參謀指派你，著照上帝交託你的律法視察猶大及耶路撒冷。

15你著帶我及我的參謀甘心獻互住佇耶路撒冷的以色列上帝的金銀；

16閣帶你佇巴比倫全省所得著的金銀，以及人民及祭司歡喜為著耶路撒冷𪜶的上帝的聖殿奉獻的禮物。

17你著善用諸個金銀，買牛仔、綿羊、羊羔、五穀，及酒，獻佇耶路撒冷恁的上帝殿的祭壇。

18賰的金銀，著照恁的上帝的旨意，用佇你及你的同事看做好的所在。

19所有交互你，欲佇你的上帝殿內做服事的器具，著攏下佇耶路撒冷的上帝面前。

20你的上帝的殿若猶欠用什麼，需要你設法的，通對皇帝的府庫支出。

21我亞達薛西閣下令河西省所有管府庫的官員：精通天頂上帝律法的經學教師，祭司以斯拉，伊無論對恁要求什麼，恁攏著確實辦理；

22數量最高通到銀三千四百公斤、麥一萬公斤、酒兩千公升、油兩千公升、鹽無限。

23天頂的上帝所命令的，恁著為天頂上帝的聖殿切實去做，才免上帝的大受氣臨到我及我的子孫的國。

24我閣命令恁，祭司及利未人、獻詩的、聖殿的守衛及工人，以及佇上帝的殿侍奉的人，攏毋通要求𪜶進貢，納稅，繳糧食。

25 以斯拉，照你的上帝賞賜你的智慧，指派許個識上帝律法的人做審判官及官員，治理河西省的人民，教導猶毋識律法的人。

26若有人無欲遵守你的上帝的律法及王的命令的人，著嚴嚴給𪜶定罪；給𪜶判死刑，流放，財產充公，抑是關監。

以斯拉稱讚上帝

27 以斯拉講：「上主 — 咱列祖的上帝應該受稱讚！因為伊互皇帝有此款的心意，互耶路撒冷上主的聖殿得著尊榮。

28伊閣互我對王、伊的參謀，及所有有權的官員得著幫贊。上主 — 我的上帝賜我勇氣，互我會當召集以色列的首領，及我做夥轉來。」