以西結書 36 - 現代台語譯本漢字版(TTVH)-闽南语

上帝賜福以色列

1-2上主命令我對以色列的眾山傳達伊的信息，將至高上主的話給𪜶講。上主講：「人子啊，因為以色列的對敵曾講：『哈哈！以色列古早就有的山崙仔欲變做阮的產業啦！』

3所以你著傳達我 — 至高的上主的信息，講：『因為對敵互你荒廢，對四面踐踏你，互你成做其他國家的產業，互𪜶的人民給你恥笑，當做笑談；

4所以，恁諸個大山小山、溪溝山谷、拋荒的地、荒廢的城，互周圍列國佔領受譏刺的，著聽至高上主的話。

5我 — 至高的上主按呢講：我的受氣親像火啲𤏸，欲譴責列國及以東人，因為𪜶心存惡毒，佔領我的土地，歡喜快樂將伊當做戰利品。』

6-7「所以，你著對大山小山、溪溝山谷傳達我有關以色列土地的信息，講：『因為恁有受列國凌辱，所以，我 — 至高的上主大受氣立誓講：恁四周圍的列國一定嘛會受凌辱。至高的上主按呢宣告。

8毋拘，以色列的眾山，樹木會閣茂盛，為著我的子民以色列恁諸個人結果子。恁真緊就會轉來。

9我關心恁，疼惜恁，欲互恁的土地會當閣開墾種作。

10我欲互以色列人口加添，城鎮有人徛起，荒埔閣再重建。

11我欲互恁及恁的牲生攏興旺，生湠真多。我欲互恁住佇早前住過的所在，賞賜恁比以前閣較多的福氣。按呢，恁就知我是上主。

12我欲互我的子民以色列恁諸個人佇眾山的頂面行踏；𪜶欲成做恁的產業，𣍐閣互恁佇遐喪失兒女。

13「『我 — 至高的上主按呢講，人曾講：此塊地會吞食人，閣互國家喪失人民。

14今，此塊土地𣍐閣吞食人，𣍐閣互人民喪失子女。我 — 至高的上主按呢宣布。

15你此塊土地𣍐閣受列國凌辱，𣍐閣受萬族譏刺，嘛𣍐閣互人民喪失子女。我 — 至高的上主按呢宣布。』」

以色列的新生活

16上主對我講：

17「人子啊，以色列人住佇𪜶本地的時，𪜶的所行所做將彼塊土地拍垃墋。對我看，𪜶的行為親像經期中的婦女無清氣。

18因為𪜶佇遐刣人，拜偶像，拍垃墋彼塊土地，所以，我欲將我的大受氣摒落佇𪜶身上。

19我欲照𪜶的所行所做刑罰𪜶，給𪜶放逐去外邦，四散佇列國。

20人攏啲講：『諸個人是上主的人民，煞著離開上主的地。』𪜶互我神聖的名佇𪜶去的列國受褻瀆。

21我珍惜我的聖名，毋拘以色列人無論互人掠去叨位，攏互我神聖的名受褻瀆。

22「所以，著給以色列人講，我 — 至高的上主按呢講：『以色列人，我欲做的事，毋是為著恁，是為著我神聖的名，因為此個名佇恁去的列國中受褻瀆。

23恁曾互我的名佇列國中受褻瀆，毋拘我欲佇𪜶中間顯明我的名是至大神聖。按呢，𪜶就知我是上主。我 — 至高的上主按呢宣布。

24我欲對列國中導恁出來，對萬邦聚集恁，導恁轉去家己的鄉土。

25我欲用清水給恁灑，恁就清氣。我欲給恁洗清氣，除去恁一切的污穢及所有的偶像。

26「『我欲賜恁新的心，將新的神囥佇恁內面。我欲對恁的身軀除去親像石頭赫呢碇的心，閣賞賜恁親像肉赫呢軟的心。

27我欲將我的神囥佇恁內面，互恁會遵守我的規例，順趁我的命令。

28恁欲住佇我賜互恁祖先的彼塊土地。恁欲做我的子民，我做恁的上帝。

29我欲救恁脫離一切的污穢，嘛欲互恁五穀豐收，𣍐閣有飢荒。

30我欲互恁的樹木𠢕結果子，田園出產真多，互恁𣍐閣因為飢荒受列國侮辱。

31彼時，恁會想起家己邪惡的行為及所犯的罪過，嘛欲因為恁的罪惡及通厭惡的事厭賤家己。

32以色列人，恁著知，我按呢做毋是為著恁。恁著為家己的行為見笑歹勢。至高的上主按呢宣布。』

33「至高的上主按呢講：『我將恁所有的罪潔淨了後，欲互恁的城鎮有人徛起，荒埔閣再重建。

34此塊拋荒的地，就是過路的人早前看做荒埔的所在，今會當開墾種作。

35𪜶欲講：此塊以前拋荒的地，現在竟然親像伊甸園；諸個拋荒、荒廢、互人毀壞的所在，現在變做堅固、有人徛起的城鎮。

36彼時，你四周圍猶未滅亡的國家欲知，是我上主重建荒廢的城鎮，閣再將荒埔開墾種作。我上主講出嘴，一定實行。』

37「至高的上主按呢講：『我欲閣回應以色列人對我的懇求，互𪜶的人口親像羊群赫呢多。

38荒廢的城鎮欲閣有人挨挨揢揢，親像耶路撒冷佇節期獻祭的羊群赫呢多。按呢，𪜶就知我是上主。』」