約書亞記 7 - 現代台語譯本漢字版(TTVH)-闽南语

1 以色列人佇應該毀滅獻互上主的物有犯罪。猶大支族中，謝拉的曾孫，撒底的孫，迦米的子亞干提應該毀滅的物；上主就對以色列人發受氣。

2 約書亞對耶利哥派人去伯特利東旁，伯‧亞文附近的艾城，吩咐𪜶，講：「恁去探查彼個地。」𪜶就去探查艾城。

3𪜶倒來約書亞遐，對伊講：「毋免互所有的人民攏去，干焦兩三千人去拍艾城就好；毋免勞動所有的人民，因為遐的人真少。」

4所以大約有三千人去攻打，毋拘煞互艾城的人拍敗。

5艾城的人對城門前追趇𪜶，到示巴琳落崎的所在拍死約略三十六個人。以色列人就攏驚甲神不附體。

6 約書亞就拆裂衫；伊及以色列的長老佇上主約櫃的頭前仆佇土腳，閣用土粉糝頭殼，到下昏。

7約書亞講：「唉啊，至高的上主，你是按怎導諸個人民過約旦河，將阮交互亞摩利人，互𪜶給阮消滅？阮寧可留𫢶約旦河彼旁。

8主啊，以色列人既然佇對敵面前越轉身逃走，我猶有什麼話通講？

9迦南人及此所在的住民若聽著，一定會來包圍阮，給阮的名對地上除去；彼時你欲按怎維護你的大名？」

10上主給約書亞講：「起來，你是按怎仆佇土腳？

11以色列人犯罪，違背我命令𪜶的約，提應該毀滅獻互我的物；𪜶偷提，欺騙，藏佇𪜶的器具內。

12因為按呢，以色列人刣𣍐贏對敵；𪜶佇對敵的面前越轉身逃走，是因為𪜶成做應該毀滅的。恁若無將應該毀滅獻互我的物，對恁中間除去，我就無閣及恁同在。

13起來！著互人民分別作聖，給𪜶講：『恁著家己分別作聖，為著明仔載準備。上主 — 以色列的上帝按呢講：以色列人，恁中間有應該毀滅的物，若無交出來，恁一定𣍐當抵抗對敵。』

14明仔早起，恁著照支族來我遮；上主互叨一個支族抽著籤，𪜶的宗族著一個一個來我遮；上主互叨一個宗族抽著籤，𪜶的家族著一個一個來我遮；上主互叨一個家族抽著籤，𪜶的查甫人著一個一個來我遮。

15上主互伊抽著籤的人，就是有應該毀滅的物佇伊遐；伊及伊所有的攏著用火給𪜶燒滅，因為伊有違背上主的約，閣佇以色列中做愚戇的代誌。」

16隔日，約書亞透早起來，互以色列人照支族來伊遐，抽著猶大支族；

17就互猶大照宗族來伊遐，抽著謝拉的宗族；就互謝拉照家族來伊遐，抽著撒底的家族；

18就互撒底家族的查甫人一個一個來伊遐，就抽著亞干；伊是猶大支族謝拉的曾孫，撒底的孫，迦米的子。

19約書亞對亞干講：「我的子，我勸你著榮耀上主 — 以色列的上帝，佇伊的面前認罪，將你所做的代誌給我講，毋通對我隱瞞。」

20 亞干應約書亞講：「我實在有得罪上主 — 以色列的上帝。我所做的事是按呢：

21我佇搶來的財物中看著一領巴比倫的媠衫、兩公斤的銀、半公斤的金條；我貪著諸個物，就提來。現在許個物件埋佇我布棚內面的土腳，銀佇上下底。」

22 約書亞就派人走去亞干的布棚；許個物件果然藏佇伊的布棚內，銀佇上下底。

23𪜶就將許個物件對布棚提出來，帶來約書亞及以色列人民遐，下佇上主的面前。

24約書亞及以色列人民將謝拉的曾孫亞干，及許個銀、彼領衫、金條，及伊的子、查某子、牛、驢、羊、布棚，及伊所有的，攏帶去亞割山谷。

25約書亞講：「你哪會害阮抵著即呢大的災禍？今仔日上主嘛欲降災禍互你。」對按呢，以色列人民用石頭給亞干抌死，用火燒伊所有的，然後用石頭㧒佇彼頂面。

26眾人佇亞干屍體的頂面疊一大堆石頭，到今仔日猶佇遐。對按呢，上主收回伊的大受氣。所以彼所在叫做亞割山谷，到今仔日。