1後來，我有看見四個天使徛佇地的四角頭，將地四面的風截起來，互風𣍐吹著地、海，及一切的樹木。
2我閣看見另外一個天使提永活上帝的印，對日出的所在上來；伊對有領受權柄通傷害地及海彼四個天使大聲喝，
3講：「阮猶未佇上帝僕人的頭額蓋印以前，毋通傷害地、海，及樹木。」
4我聽見，佇以色列逐個支族中受蓋印的人攏總有十四萬四千。
5屬猶大支族受蓋印的人有一萬兩千；
屬呂便支族的人有一萬兩千；
屬迦得支族的人有一萬兩千；
6屬亞設支族的人有一萬兩千；
屬拿弗他利支族的人有一萬兩千；
屬瑪拿西支族的人有一萬兩千；
7屬西緬支族的人有一萬兩千；
屬利未支族的人有一萬兩千；
屬以薩迦支族的人有一萬兩千；
8屬西布倫支族的人有一萬兩千；
屬約瑟支族的人有一萬兩千；
屬便雅憫支族受蓋印的人有一萬兩千。
對逐所在來的一大群人9後來，我閣看，有看見一大群人，無人會當計算𪜶的數目，是對逐國、逐族群、逐民族、講逐款語言的人來的，攏徛佇寶座及羊羔的面前，穿白衫，手攑棕樹枝。
10𪜶大聲喝：
願拯救歸佇坐佇寶座的咱的上帝，
嘛歸佇羊羔！
11所有的天使攏徛佇寶座、長老，及四個活物的周圍，𪜶佇寶座前，面仆落去敬拜上帝，
12講：
阿們！願頌讚、榮光、智慧、
感謝、尊貴、權能、氣力，
歸佇咱的上帝，到永永遠遠。阿們！
13長老中有一個問我講：「諸個穿白衫的是什麼人？𪜶對叨位來？」
14我應講：「先生，你知。」
後來伊給我講：「諸個人是經過大災難出來的，𪜶有洗𪜶的衫，用羊羔的血洗到白。
15所以，𪜶佇上帝的寶座前，
暝日佇伊的聖殿服事伊；
坐佇寶座彼位欲保護𪜶。
16𪜶𣍐閣枵，𣍐閣嘴焦；
日頭及炎熱攏𣍐傷害𪜶。
17佇寶座中的羊羔欲做𪜶的牧者；
伊欲導𪜶到活命水的泉源；
上帝欲對𪜶的目睭拭去攏總的目屎。」
Who We AreWhat We EelieveWhat We Do
2025 by iamachristian.org,Inc All rights reserved.
