詩篇 48 - 現代台語譯本漢字版(TTVH)-闽南语

可拉後代的詩歌。錫安 — 上帝的城

1上主至大，

佇咱上帝的城，

佇伊聖的山，

應該大大受稱讚。

2 錫安山佇北面，高閣好看，

全地所歡喜，大君王的城。

3上帝佇城的要塞啲顧守，

互人知伊是避難所。

4看啊，列王聚集，

鬥陣進軍欲攻城。

5𪜶一下看著此個城就卬愕，

驚惶，趕緊逃走。

6𪜶佇遐愕愕惙，

親像催陣的婦仁人痛疼，

7親像他施的船互東風拍破。

8佇上主 — 萬軍的統帥的城內，

佇咱上帝的城中，

咱曾聽著，現在親目看著，

上帝欲顧守此個城到永遠。

9上帝啊，佇你的殿內，

阮數念你的慈愛。

10上帝啊，你的名傳到全地，

謳咾的聲透到天邊海角。

你的統治充滿公義，

11你的判斷正確，

錫安山著歡喜，

猶大的城市著快樂。

12恁著踅錫安，周圍踅一輪，

點算城塔，

13觀察城牆，欣賞堡壘，

通互恁對後代宣告：

14此位上帝是咱永永遠遠的上帝，

伊會永遠引導咱。