約翰二書 1 - 現代台語譯本漢字版(TTVH)-闽南语

請安

1我長老寫批互受揀選的夫人及你的子兒：我真心疼恁，毋若我，連所有認識真理的人嘛疼恁；

2因為真理𫢶佇咱內面，會永遠及咱同在。

3願父上帝及父的子耶穌基督賜咱恩典、憐憫，及平安，互咱的生活充滿真理及仁愛！

真理及仁愛

4我非常歡喜，因為我發見你的子兒中間有人遵趁父的誡命，實行真理。

5夫人啊，我要求你，咱著相疼。我啲寫互你的毋是新的誡命，是咱對起頭就領受的。

6咱照上帝的誡命生活，就是疼。此個誡命是恁對起頭所聽著的，著照此個誡命生活。

7有真多迷惑者已經來到此世間；𪜶毋公開承認耶穌基督做人來世間。此款人是迷惑者，是基督的敵對者。

8著小心，恁所做的工才𣍐落空，反轉會得著充足的報賞。

9偏離無堅守基督教示的人無及上帝結連。堅守教示的人才有及父以及子結連。

10若有人去恁遐，所傳違背此款的教示，毋通接納伊入恁的厝，嘛毋通給伊請安，

11因為給伊請安就是參與伊的歹行為。

最後的話

12我猶有真多話愛寫，毋拘無愛用紙筆；我較向望去恁遐，當面及恁講，通互咱的歡喜充滿。

13及你平平受揀選彼個姊妹的子兒欲給你請安。