1看咧，上主互大地拋荒，完全荒廢；
伊給地面反輾轉，互住民攏四散。
2人民按怎，祭司嘛按呢；
僕人按怎，主人嘛按呢；
女婢按怎，女主人嘛按呢；
買物的按怎，賣物的嘛按呢；
給人借的按怎，借人的嘛按呢；
散赤的按怎，好額的嘛按呢。
𪜶攏會四散。
3大地會完全拋荒，互人搶甲空空。
上主按呢宣告。
4大地衰敗，焦去；
世界衰敗，倒壞；
地上高貴的人嘛衰微。
5大地互徛起的住民污染；
𪜶破壞律法，違反律例，
違背永遠的約。
6所以，大地受咒詛致到敗壞，
地上的住民攏因為𪜶的罪受刑罰；
所賰的人減少，
賰無幾個。
7新酒焦去，葡萄樹枯焦；
快樂的人嘛攏吐氣。
8玲瓏鼓快樂的聲恬去，
宴樂吵鬧的聲靜去，
彈琴的聲音嘛攏無去。
9無閣有人飲酒唱歌；
厚酒飲起來苦嗏嗏。
10城拋荒，受拆毀；
厝攏關啲，無人出入。
11人佇街路喝欲尋酒飲；
一切的快樂變做暗淡，
地上的歡喜攏消失。
12城市荒廢，
城門摃甲碎糊糊。
13地上萬民嘛會按呢，
親像橄欖樹葡萄樹收成了，閣尋嘛尋無偌多。
14𪜶大聲歡呼，
對西旁宣布上主的威嚴。
15因為按呢，恁著對東旁歸榮光互上主，
佇眾海嶼稱讚上主 — 以色列的上帝的名。
16對天邊海角，阮聽著歌聲：
「榮光歸互公義的上帝！」
毋拘我講：「我會死！我會死！
我慘啊！背叛的人繼續背叛；
欺騙的人猶啲欺騙。」
17地上的住民啊，
恐怖、陷坑、活罩啲當等恁。
18閃避恐怖聲音的人會跋落陷坑；
對陷坑逃脫的人會互活罩罩著。
天頂的窗仔攏拍開；
地上的根基搖動。
19大地做一下破壞，
裂甲碎碎；
地大搖動，
20親像酒醉的人顛來顛去，
若準草厝仔搖來搖去。
地互罪重重硩咧，
崩落去，𣍐閣再起來。
21彼日，上主欲刑罰天頂的天軍，
嘛欲處罰地上的君王。
22𪜶會親像犯人互人集中佇地牢，
關佇監獄；
過一段時間就受刑罰。
23彼時，月娘會見笑，日頭會漏氣，
因為上主 — 萬軍的統帥欲佇錫安山，佇耶路撒冷作王，
對伊的長老顯出榮光。
Who We AreWhat We EelieveWhat We Do
2025 by iamachristian.org,Inc All rights reserved.
