2 Makabeonan 5 - Papiamentu Bible with DC 2013(PBDC13)

HERUSALÈM TA BIRA UN KAMPO DI BATAYASeñal grandi na shelu

1Den tempu ku rei Antíoko IV a sali bai bringa pa di dos bia kontra Egipto,

2a sosodé ku mas o ménos kuarenta dia largu tur kaminda den siudat nan a mira aparishonnan di sòldá di kabayeria bistí ku paña dòrná ku hilu di oro. E sòldánan tabata armá ku lansa i tabata pasa na grupo den laria ku spada saká for di baliña.

3Eskuadron di kabayeria den fila tabata ataká tur parti, zuai ku eskudo i mashá hopi lansa, tabatin tiramentu di flecha, i den e baiben ei e adorno di oro di tur sorto di korasa tabata bria.

4Tur habitante di Herusalèm tabata resa pa e manifestashon supernatural akí tabata pronostiká algu bon.

Eks gransaserdote Yason ta ataká Herusalèm

5Komo e notisia falsu a kore ku Antíoko a muri, Yason a reuní no ménos ku mil sòldá i a ataká e siudat di sorpresa. Finalmente, despues di a kore ku e defensornan di e murayanan, el a konkistá e siudat; Menelao a buska refugio den e fòrti.

6Sin tene kompashon ku niun hende, Yason a tene un masakre bou di su mes kompatriotanan, sin pensa ku ora un hende vense su paisanonan esei ta e derota di mas pió ku por tin. E tabata mira su triunfo mas komo un viktoria riba su enemigu ku riba su kompatriotanan.

7Tòg e no a logra haña poder den su man i finalmente e mester a hui pa di dos bia bai pais di amonitanan. E atake ku el a lansa a resultá den un bèrgwensa p'e.

8Kos a bai malu pa Yason. Pa kuminsá rei Aretas di Arabia a koh'é prezu. Despues e tabata hui di siudat pa siudat. Tur kaminda nan tabata persiguié, odi'é i tabatin asko di dje, pasobra nan tabata hañ'é un hende ku a bira infiel na su fe, un burdugu di su pueblo i su patria. Finalmente el a resultá na Egipto.

9Djei el a nabegá bai Sparta, kaminda e tabata spera di haña protekshon, pasobra e hendenan di Sparta ku hudiunan tabata famia