Salmo 73 - Papiamentu Bible with DC 2013(PBDC13)

SALMO 73Mi a hera di pèrdè mi feSalmo di Asaf.

1Bèrdat, Dios ta bon pa Israel,

pa hende ku nan kurason a keda limpi!

2Tòg mi pia a hera di slep,

parumpinga mi a trompeká,

3pasobra mi tabata yalurs

riba hende yen di arogansia,

kada be ku mi tabata mira

prosperidat di hende malbado.

4Molèster nan no konosé,

nan kurpa ta gordo i salú.

5Tur hende tin problema — nan nò,

tur hende ta haña sla — nan nunka.

6P'esei nan tin orguyo pa koyar,

violensia komo paña pa nan kurpa.

7Nan kurpa ta asina gordo

ku nan wowonan ta bula afó,

nan kurason ta patapata di idea.

8Nan ta chèrchè i ta papia kos malu,

ku mal airu nan ta papia di menasa.

9Nan ta lanta bos kontra shelu

i nan lenga ta lora riba tera.

10P'esei pueblo ta sigui nan tras

i ta bebe golos di nan awa.

11Nan ta bisa: ‘Kon Dios lo por sa?

Dios Altísimo lo kai ariba antó?’

12Asina nan ta, e malbadonan,

semper nan ta sin preokupashon

i ketu bai nan ta bira mas riku.

13Ai, ta pòrnada antó

mi a tene mi konsenshi limpi,

mi a laba man den inosensia,

14miéntras mi ta tormentá henter dia

i ta mortifiká tur mainta?

15Pero si, enkambio, lo m'a bisa:

‘Laga mi papia meskos ku nan’,

mira, lo m'a bira infiel

na e kompania di bo yunan.

16Mi a kibra mi kabes pa komprondé,

ma e asuntu a keda preokupá mi,

17te ora ku m'a drenta Dios su tèmpel

i m'a bin komprondé nan destino.

18Bèrdat, Bo ta pone nan pia

riba un kaminda ku ta slep,

Bo ta laga nan kai na ruina.

19Esta spantoso nan a bira diripiente!

Ta dato! Peresé horiblemente!

20Manera si nan tabata un soño

di un hende ku ta spièrta, Señor,

Abo tambe, ora Bo spièrta,

Bo n' sa mes kon nan tabata.

21Ora ku mi sanger a daña

i m'a kunsumí te den mi higra

22mi tabata bobo, ignorante,

un animal sin sintí Bo dilanti.

23Sinembargo mi ta semper serka Bo,

Abo ta tene mi man drechi,

24ta guia mi segun bo plan

i na final lo tuma mi den gloria.

25Ken mi tin den shelu? Abo so!

Si mi ta ku Bo, kiko mundu ta importá mi?

26Maske mi kurpa i kurason por sukumbí

Dios ta semper mi baranka,

E ta mi poseshon, mi n' por pèrd'É.

27Sí, esnan ku ta leu di Bo ta pèrdè;

Bo ta destruí tur hende

ku ta laga Bo pa sigui otro dios.

28Pa loke ta toka ami

mihó mi keda serka Dios;

serka SEÑOR Dios mi tin mi refugio.

Laga mi proklamá tur bo obranan!