1Felis t'esnan ku nan andá ta sin mancha,
siguiendo lei di SEÑOR!
2Felis esnan ku ta warda su preseptonan
i ta busk'É di kurason,
3ku sin kometé nada malu
ta sigui su kamindanan!
4Bo a ordená pa bo dekretonan
ta opservá estriktamente.
5O mare mi por keda semper fiel
den kumplimentu ku bo òrdunan,
6anto lo mi n' sinti bèrgwensa
ora mi fiha bo mandatonan.
7Ku sinseridat di kurason mi ta alabá Bo,
siñá pa bo dekretonan hustu.
8Lo mi keda fiel na bo leinan,
Abo no bandoná mi.
29Kon un hóben su andá por keda limpi?
Si e warda bo palabra.
10Mi ta buska Bo di henter mi kurason,
no laga mi desviá di bo òrdunan.
11Mi ta warda bo palabra den mi alma,
pa mi no peka kontra Bo.
12SEÑOR, bendishoná Bo mester ta,
siña mi bo leinan.
13Lo mi ripití na bos altu
loke bo boka a ordená.
14Mi ta gosa e kaminda di bo huisionan
manera tur sorto di rikesa.
15Mi ke meditá bo mandamentunan
i fiha bo kamindanan.
16Mi tin mi plaser den bo preseptonan,
lo mi no lubidá bo palabra.
317Trata bo sirbiente pa mi biba
i lo mi warda bo palabra.
18Habri mi wowo pa mi mira
tur maravia di bo lei.
19Mi ta un peregrino riba mundu,
no skonde bo mandatonan pa mi.
20Mi alma ta muri di anhelo
pa bo dekretonan, tur ora.
21Bo ta skual e malditu arogantenan,
ku ta dualu leu di bo òrdunan.
22Kita insulto i despresio fo'i mi,
komo m'a warda bo preseptonan.
23Ounke shon grandinan ta uni
pa nan kònkel kontra mi
bo sirbidó ta meditá bo leinan.
24Bo huisionan, nan ta mi delisia,
nan ta mi konsehero.
425Ata mi den stòf: duna mi bida
konforme bo promesa.
26M'a konfesá Bo mi andá i B'a skucha mi,
siña mi bo preseptonan.
27Mustra mi e direkshon di bo dekretonan
pa mi studia bo milagernan.
28Mi ta yora di fèrdrit, lanta mi,
konforme bo promesa.
29Warda mi pa mi n' kohe mal kaminda,
den bo bondat duna mi bo lei.
30Mi ke kohe kaminda di bèrdat,
pone bo òrdunan dilanti.
31Mi ta tene mi na bo huisionan,
SEÑOR, no brongosá mi,
32Mi ta kore lihé riba e kaminda
ku bo mandamentunan ta mustra:
Bo ta aliviá mi kurason.
533SEÑOR, mustra mi e kaminda di bo òrdunan,
pa mi kan'é te na fin.
34Habri mi mente pa mi kumpli ku bo lei,
pa mi ward'é di kurason.
35Pone mi sigui direkshon di bo mandatonan,
pasobra nan ta mi goso.
36Dirigí mi kurason na bo preseptonan,
mas bien ku na ganashi.
37Kita mi bista for di kosnan sin balor,
laga mi biba, siguiendo bo kaminda.
38Loke B'a primintí bo sirbidó
kumpli kuné pa nos teme Bo.
39Kita bèrgwensa fo'i mi, mi n' por want'é,
ya ku bo leinan ta bon.
40Mira kuantu mi ta stima bo dekretonan.
Duna mi bida! Bo n' ta hustu?
641SEÑOR, laga mi sinti bo bondat,
bo salbashon primintí.
42Anto mi por rospondé mi ofensornan,
den bo palabra mi ta konfia.
43Pone mi papia bèrdat tur ora,
mi tin konfiansa den bo òrdunan.
44Mi ke kumpli ku bo lei tur ora bai,
semper, den tur eternidat.
45Lo mi por kana unda ku mi ke,
konsultando bo dekretonan.
46Lo mi konta reinan di bo huisionan,
i lo mi n' sinti ripara.
47Goso profundo mi tin den bo mandatonan
ku mi ta stima tantu.
48Mi ta habri man pa bo preseptonan stimá,
ta meditá bo mandamentunan.
749Kòrda e palabra ku B'a duna bo sirbiente,
e ta duna mi konfiansa.
50Mi konsuelo den tristesa ta esaki:
ku bo promesa a rebibá mi.
51Hende sobèrbè ta ofendé mi sin fin,
ma mi n' ke kita fo'i bo lei.
52Kòrdamentu di bo òrdunan antiguo
ta konsolá mi, SEÑOR.
53Rabia ta drenta mi, si mi mira
mal hende kibra bo siñansa.
54Bo mandamentunan a bira mi kansion,
den mi lugá di destiero.
55SEÑOR, anochi mi ta kòrda bo nòmber
i kon ta kumpli ku bo lei.
56At'akí loke ta toka mi:
warda bo preseptonan.
857Mi di: SEÑOR, mi porshon, esei ta:
warda bo palabranan.
58Di henter mi alma mi ta buska bo fabor:
piedat di mi, segun bo promesa.
59Mi a saminá mi andá,
m'a dirigí mi na bo huisionan.
60Mi a hasi purá, mi no a tarda
pa obedesé bo mandamentunan.
61Kabuya di mal hende a mara mi,
mi n' lubidá bo preseptonan.
62Meianochi mi ta lanta pa alabá Bo
pa bo dekretonan hustu.
63Mi ta amigu di tur ku ta sirbi Bo,
ku ta kumpli ku bo òrdunan.
64SEÑOR, mundu ta yen di bo amor,
siña mi bo leinan.
965Ki bondat B'a demostrá bo sirbidó,
SEÑOR, konforme bo promesa!
66Duna mi sano huisio, komprenshon,
mi tin konfiansa den bo òrdunan.
67Promé ku topa sufrimentu mi a dualu,
ma awor ta bo palabra ta amèn.
68Bo ta bon i Bo ta hasi bondat,
instruí mi den bo leinan.
69Hende tribí a akusá mi di mentira,
ami tan fiel na bo preseptonan!
70Nan kurason ta será, puru vèt,
ma mi enkanto ta bo lei.
71Esta bon ku m'a topa sufrimentu,
esei a siña mi bo mandatonan.
72Lei for di bo boka bal mi mas
ku mil plaka di oro i plata.
1073Bo mannan a traha mi i forma mi;
habri mi mente pa mi siña bo mandatonan.
74Bo fielnan lo mira ku alegria
ku mi tin fe den bo palabra.
75Mi sa, SEÑOR, ku bo dekretonan ta hustu,
ku B'a flihi mi ku rason.
76Bo amor duna mi konsuelo:
B'a primintí bo sirbidó!
77Si bo ternura alkansá mi, mi ta biba,
ya ku bo lei ta mi plaser.
78Laga hendenan tribí sinti bèrgwensa,
ku nan a maltratá mi sin motibu;
ami lo warda bo preseptonan.
79Laga bo fielnan bolbe serka mi,
nan ku a kapta bo huisionan.
80Mi kurason warda bo leinan estriktamente,
pa mi no keda brongosá.
1181Mi t'anhelá bo salbashon ansiosamente,
den bo palabra mi ta spera.
82Mi wowo t'anhelá bo promesa,
mi di: Bo n' ta konsolá mi?
83Maske kurtí manera kueru den huma,
mi n' lubidá bo dekretonan.
84Kuantu mas bo sirbidó lo tin di warda
pa Bo suta esnan ku persiguí mi?
85E arogantenan a traha trampa pa mi,
ignorando bo lei.
86Tur bo òrdunan ta drechi, pues yuda mi:
nan ta mi tras sin motibu.
87Nan a hera di pone un fin
na mi bida riba mundu,
ma mi no a bandoná bo mandamentunan.
88Den bo bondat laga mi biba, pa mi kumpli
ku tur presepto di bo boka.
1289Bo palabra, SEÑOR, ta eterno,
fihá firme den shelu.
90Bo fieldat ta pa tur generashon;
B'a funda tera: at'é ei.
91Pa bo palabra tur kos t'ei te dia djawe,
tur den bo sirbishi.
92Si bo lei no tabata mi delisia
lo mi a muri di tristesa.
93Hamas i nunka lo mi no lubidá
bo mandamentunan, pasobra pa nan
Bo a duna mi bida nobo.
94Ta di Bo mi ta, salba mi,
mi ke siña bo òrdunan.
95Pekadónan ta lur pa kaba ku mi,
ma mi ta studia bo dekretonan.
96M'a mira fin di tur loke ta perfekto,
ma bo mandato ta sin límite.
1397Kuantu mi ta stima bo lei!
T'e mi ta studia henter dia.
98Bo mandamentu ta hasi mi mas sabí
ku mi enemigunan
ya k'e ta semper mi kompaño.
99Mi a gana mas komprenshon
ku esnan ku a siña mi,
pasobra mi ta studia bo huisionan.
100Mi tin mas komprenshon ku ansianonan,
komo m'a warda bo dekretonan.
101M'a kita pia for di kualke mal kaminda,
pa mi warda bo palabra.
102Mi no a desviá di bo mandatonan,
pasobra t'Abo a siña mi.
103Esta dushi, e smak di bo promesa,
mas ku miel den mi boka!
104Mi mente ta habrí pa bo òrdunan,
tur mal kaminda mi ta odia.
14105Bo palabra ta un lampi pa mi pia,
un lus riba mi kaminda.
106Mi a hura — i lo mi kumpli — di bai warda
bo mandamentunan hustu.
107Mashá flihí mi ta, SEÑOR, duna mi bida,
primintí ta debe.
108SEÑOR, aseptá e promesanan
ku mi boka a hasi Bo;
siña mi bo dekretonan.
109Maske mi bida ta semper na peliger,
bo lei mi no ta lubidá.
110Pekadónan a pone trampa pa mi,
ma mi n' ta kita fo'i bo òrdunan.
111Bo huisionan — pa semper mi tesoro —
ta alegrá mi kurason.
112M'a pone mi pa kumpli ku bo leinan
pa semper, te na fin.
15113Mi n' ta gusta ora hende hunga ròl:
ami ta stima bo lei.
114Bo ta mi refugio, mi eskudo,
mi tin fe den bo palabra.
115Malechornan, bai fo'i mi! Mi ke hasi
loke mi Dios ta manda.
116Sostené mi, konforme bo promesa,
anto lo mi biba,
no konfundí mi speransa.
117Apoyá mi pa mi ta fo'i peliger,
i lo mi sigui wak bo huisionan.
118Bo ta rechasá tur hende
ku desviá di bo dekretonan,
nan astusia ta enbano.
119Pa Bo tur malbado ta basura,
ma ami stima bo preseptonan.
120Mi kurpa ta rel di spantu pa Bo,
mi tin rèspèt di bo òrdunan.
16121Loke ta drechi i hustu mi a hasi,
no entregá mi den man di mi opresornan.
122Sali na fabor di bo sirbiente,
no laga hende insolente oprimí mi.
123Mi wowo t'anhelá bo salbashon
i bo promesa di hustisia.
124Trata bo sirbidó, segun bo amor,
siña mi bo leinan.
125Mi ta bo sirbidó, habri mi mente,
pa mi siña bo preseptonan.
126Ta tempu pa Bo aktua, SEÑOR:
nan a bai kontra bo òrdunan.
127P'esei bo mandamentunan bal mi
mas ku oro, oro fini.
128P'esei mi ta laga bo dekretonan
guia mi den tur kos;
tur mal kaminda mi ta odia.
17129Esta atmirabel ta bo huisionan;
di henter mi alma mi ta sigui nan.
130Bo palabra, si splik'é, ta trese lus,
ta hasi bobonan sabí.
131Mi ta habri mi boka hanchu,
golos pa bo mandatonan.
132Drei mira mi i tene kompashon,
manera Bo sa hasi
ku esnan ku ta stima bo nòmber.
133Guia mi paso segun bo promesa,
pa maldat no dominá mi.
134Libra mi di preshon di hende,
i lo mi warda bo dekretonan.
135Laga bo Kara iluminá bo sirbidó
i siña mi bo preseptonan.
136Roinan di awa ta brota fo'i mi wowo:
nan n' tin rèspèt pa bo lei.
18137SEÑOR, Abo ta hustu
i bo òrdunan legítimo.
138Bo a saka huisionan hustu,
mashá digno di konfiansa.
139Mi zelo ta kima mi, pasobra
mi opresornan no ta kòrda bo palabranan.
140Bo promesa ta di bon kalidat,
bo sirbidó ta stim'é.
141Maske sin balor i despresiá
mi n' lubidá bo dekretonan.
142Bo hustisia ta hustisia eterno,
bo lei ke men bèrdat.
143M'a haña mi anshá i den pèrtá,
pero m'a gosa bo mandatonan.
144Bo preseptonan ta bálido pa semper,
habri mi mente pa mi biba.
19145Ku tur mi forsa mi ta sklama: SEÑOR, tende,
lo mi kumpli ku bo leinan!
146Mi ta invoká Bo, yuda mi,
lo mi warda bo dekretonan.
147Mardugá grandi ya mi gritu ta subi;
den bo palabra mi ta spera.
148Mi wowo no por warda anochi sera
pa meditá bo promesa.
149Den bo bondat skucha mi bos, o SEÑOR,
ku Bo ke, duna mi bida.
150Nan ku ta plania wega sushi ta serka,
ma nan ta leu di bo siñansa.
151Abo mes, SEÑOR, ta serka,
tur bo mandatonan ta sólido.
152Mashá ten m'a komprondé di bo preseptonan
ku Bo a fiha nan pa semper.
20153Mira mi mizeria, salba mi;
bo lei mi no ta lubidá.
154Defendé mi kousa, reskatá mi,
B'a primintié, duna mi bida!
155Salbashon ta keda leu fo'i malechornan,
nan no ta puntra pa bo leinan.
156Bo ternura, SEÑOR, ta grandi,
ku Bo ke, duna mi bida.
157Mi enemigu- i opresornan ta hopi,
ma mi n' ta kita fo'i bo huisionan.
158Ku avershon mi ta mira e traidornan:
nan no ta sigui bo palabra.
159Mira kon mi ta stima bo dekretonan,
piedat, SEÑOR, duna mi bida.
160Bo palabra ta puru bondat,
bo òrdunan hustu ta eterno.
21161Shonnan grandi ta mi tras sin motibu:
mi kurason ta respetá bo palabra.
162Mi ta gosa bo palabra mes tantu
ku ora haña un tesoro.
163Mi ta odia i detestá falsedat,
ma mi ta stima bo lei.
164Mi t'alabá Bo shete be pa dia
pa bo preseptonan hustu.
165Esnan ku stima bo leinan tin pas grandi,
no tin opstákulo pa nan.
166SEÑOR, mi t'anhelá bo salbashon,
loke Bo manda mi ta hasi.
167Mi kurason ke sigui bo huisionan,
mi ta stima nan mashá.
168Mi ta warda bo dekreto i huisionan,
Bo sa tur loke mi ta hasi.
22169Laga mi gritu, SEÑOR,
yega te den bo presensia;
habri mi mente; sea fiel
na bo mes palabra.
170Hasi pa mi súplika por yega
te den bo presensia;
Abo, salba mi; sea fiel
na bo mes promesa.
171Ku alabansa por brota fo'i mi lepnan;
Bo n' ta siña mi bo leinan?
172Mare mi boka por kanta bo alabansa,
pasobra tur bo mandamentunan ta hustu.
173Laga bo man para kla pa yuda mi,
komo m'a skohe bo preseptonan.
174Mi t'anhelá bo salbashon, o SEÑOR,
bo lei ta mi enkanto.
175Mi alma biba pa por kanta bo alabansa,
laga bo òrdunan yuda mi.
176Mi sa dualu — un karné ku a pèrdè — :
buska bo sirbiente.
Nò, mi no a lubidá bo mandamentunan.
Who We AreWhat We EelieveWhat We Do
2025 by iamachristian.org,Inc All rights reserved.
