Job 11 - Papiamentu Bible with DC 2013(PBDC13)

Promé diskurso di SofarSofar ta bisa ku Dios no a kastigá Job manera el a meresé

1E ora ei Sofar di Naama a rospondé:

2‘Mester kontestá un hende ku un boka asina grandi,

sino e ta kapas di kere, ku e tin rason.

3Job, bo ta kere ku niun hende no por kontrarestá

bo papiamentu sin pia sin kabes;

ku niun hende no por pone bo kabes pareu,

ora bo ta pil hende?

4Bo ta pretendé ku bo punto di bista ta korekto

i ku bo no tin nada di skonde pa Dios?

5Ai, mare Dios por habri su boka

i papia direktamente ku bo.

6Mare E por splika bo

kuantu sabiduria impenetrabel E tin,

kon inkomprensibel tur kos ku E hasi ta.

E ora ei lo bo realisá

ku ni kastigá E no a kastigá bo sufisiente

pa loke bo a hasi.

Sabiduria di Dios ta surpasá Job su komprondementu

7Bo ta kere ku bo por sondia Dios,

ku bo por deskubrí límite di Dios Todopoderoso?

8Ki bo ke men antó?

Su grandesa ta surpasá shelu altu.

Ki bo ta kere?

Su poder ta yega te den reino di morto.

9Grandesa di Dios ta mas hanchu ku mundu,

mas amplio ku laman.

10Si Dios pasa kasualmente,

E haña gana di arestá bo

i hiba bo dilanti di hues,

ken por stòp E?

11Pasobra Dios sa ken ta engañoso

i ora E mira piká di hende

E no ta sera wowo p'e.

12Pero asta un hende kabes di pal'i maishi

por haña sintí;

al fin i al kabo no ta tur hende

na kuminsamentu ta tèrko manera burik'i mula?Sofar ta sigurá Job ku si Job renunsiá su maldat, Dios ta rekompens'é

13Job, si abo habri bo kurason pa Dios,

bo habri bo plant'i mannan i alsa nan den orashon,

14si bo laba bo man sushá ku piká,

i no laga maldat drenta bo kas,

15e ora ei bo por kana kara na laria,

bo por para firme i sin miedu.

16Bo ta lubidá bo problema sigur,

e ta bira un rekuerdo bago,

manera awa den roi ku a pasa bai.

17Bo bida lo bria mas ku solo di mèrdia

bo oranan di mas skur lo ta manera ourora.

18Lo bo tin seguridat, pasobra tin speransa pa bo;

Dios lo protegé bo i lo bo por sosegá sin miedu.

19Bo por kai drumi trankil

sin niun hende spanta bo;

i hopi hende lo kalanchá bo pa optené fabor.

20Pero si un hende bira lomba pa Dios,

e no por biba komprondé loke pasa kuné.

E no ta sintié sigur niun kaminda,

morto ta su úniko speransa.’