1 Krónikanan 10 - Papiamentu Bible with DC 2013(PBDC13)

Saul i su yu hòmbernan ta muri den guera(1 Samuel 31:1-13)

1E filisteonan tabata bringa kontra Israel i e israelitanan a hui pa nan. Hopi di nan a muri riba seru di Guilboa.

2E filisteonan a logra penetrá yega serka Saul i mata su yu hòmbernan Yonatan, Abinadab i Malki-Shua.

3Despues nan a konsentrá tur nan atake riba Saul. E tiradónan di flecha a deskubrié. Ora Saul a mira nan, el a haña mashá miedu.

4P'esei el a bisa su ayudante: ‘Saka bo spada i hinka mi mata, pa e paganonan ei no bini i hasi bofon di mi.’ Pero su ayudante no ker a hasié, pasobra e tabatin mashá miedu. E ora ei Saul a kohe su mes spada i a benta su kurpa riba dje.

5Ora e ayudante a mira ku Saul a muri, e tambe a benta su kurpa riba su spada i a muri huntu kuné.

6Asina Saul, su tres yu hòmbernan, henter su famia, a muri.

7Ora tur e israelitanan ku tabata biba den vaye a ripará ku e trupanan di Israel a hui i ku Saul i su yu hòmbernan a muri, nan a sali for di e siudatnan i nan tambe a hui. Despues e filisteonan a yega na e siudatnan ei i nan a keda biba ei.

8Su manisé, ora e filisteonan a bai sakia e mortonan, nan a haña Saul i su yu hòmbernan morto den seru di Guilboa.

9Nan a saki'é i a bai ku su kabes i su armanan. Nan a manda mensahero pasa den henter teritorio filisteo pa konta e bon notisia na nan dios falsu i na e pueblo.

10Nan a pone Saul su armanan den e tèmpel di nan diosnan i su kabes nan a kologá den e tèmpel di Dagon.

11Ora henter Yabèsh di Guilead a haña sa tur loke e filisteonan a hasi ku Saul,

12tur e hòmbernan ku tabata por usa arma a sali bai huntu i kita e kurpanan di Saul i su yu hòmbernan, hiba Yabèsh. Nan a dera nan wesunan bou di e palu grandi di ekel na Yabèsh. Despues nan a yuna shete dia largu.

13Asina Saul a muri, pasobra e tabata infiel na SEÑOR i no a hasi kaso di SEÑOR su palabranan;1 Samuel 13:8-14; 15:1-24 pió ainda, el a konsultá ku spiritu di defuntu,Levítiko 19:31; 20:6; 1 Samuel 28:7-8

14na lugá di a konsultá ku SEÑOR. P'esei SEÑOR a kita su bida i a pasa e reino pa David, yu di Ishai.