Sirag 33 - Papiamentu Bible with DC 2013(PBDC13)

1Nada malu lo no pasa esun ku ta respetá Señor,

ounke Dios pon'é na prueba lo E salb'é.

2Un hende sabí nunka lo no pone Lei un banda,

pero esun ku no ta tum'é na serio,

ta manera un barku den mal tempu.

3Un hende huisioso ta konfia riba Lei,

p'e e ta konta mes pisá ku Urim i Tumim.

4Si bo ke pa skucha bo,

prepará bo palabra bon;

hunta bo konosementu promé bo bisa algu.

5Mente di un kèns ta meskos ku wil di garoshi:

semper bai e ta drei bira rònt.

6Amigu ku ta pil di tur hende,

ta meskos ku kabai ku ta grita

sin tene kuenta ken ta sintá riba dje.

Pakiko tin diferensianan den kreashon?

7Di kon tin dia ku ta mihó ku otro,

si tòg tur dia di aña ta risibí su lus for di e mesun solo?

8Señor den su sabiduria a kita nan for di otro

i a traha diferente époka i fiesta.

9Algun dia El a elevá i hasi sagrado

i otro El a hasi dia normal.

10Asina tambe tur hende ta trahá for di tera,

eksaktamente manera a traha Adam for di tera.

11Sinembargo Señor den su sabiduria ilimitá

a traha tur hende diferente

i a mustra nan kamindanan diferente.

12Algun di nan El a bendishoná i hasi famoso,

otro El a santifiká pa laga nan sirbiÉ den tèmpel.

Otro atrobe El a maldishoná i humiliá

i kore ku nan for di nan lugá.

13Manera e klei ta den man di e trahadó di pòchi

pa e form'é manera e haña ta bon,

asina hende ta den man di su Kreador:

T'E ta disidí kiko E ta hasi ku kada un.

14Banda di maldat tin bondat,

banda di morto tin bida,

meskos asina banda di deboto tin pekadó.

15Di e manera ei bo mester weta tur obra di Altísimo,

tur kos ta bini dos dos, esun banda di e otro.Vokashon di Hesus Sirag

16Mi mes a subi warda komo delaster hende,

mi ta rekohé loke e pikidónan di drùif a laga atras.

17Ku yudansa di Dios mi a yega dilanti

i manera un pikidó di drùif m'a yena e baki pa machiká wendrùif.

18Mira ku no ta pa mi mes so mi a lucha duru,

ma pa tur esnan ku ta buska instrukshon.

19Tende mi, boso, prínsipenan di pueblo,

i boso, gobernantenan di komunidat, tambe skucha.

Bas òf nò

20No laga bo yu ni bo kasá, ni ruman hòmber ni amigu

haña poder riba bo tanten bo ta na bida.

No duna otro hende bo plaka:

ya despues bo no ta pidi p'e ku duele.

21Tanten bo ta na bida i tin rosea,

no laga niun hende dominá bo.

22Mihó bo yunan tin ku pidi bo algu

ku abo dependé di nan.

23Kiko ku bo hasi, abo keda bas,

sino bo por susha bo bon nòmber.

24Ora bo sinti ku bo ta bai muri,

ora bo ora yega, parti bo herensia e ora ei numa.

25Kuminda, un palu i karga ta pa buriku,

pan, kastigu i trabou ta pa katibu.

26Pone bo sirbidó traha, i abo lo por sosegá;

pero si bo no dun'é kos di hasi, lo e buska libertat.

27Ku yugo i frena ta dobla nèk di un bestia di karga

i pa un katibu rebelde tin kastigu korporal i tortura.

28Pon'é traha duru, sino e ta bira un bagamundu,

i flohera ta pon'é pensa kos malu so.

29Lag'é traha su trabou

i si e no obedesé, pon'é prezu den blòki.

30Pero bo no mag eksigí di mas di ningun hende

ni hasi nada inhustu.

31Si ta ún katibu bo tin, trat'é manera bo pareu,

pasobra bo a kumpr'é ku plaka ganá ku sodó di bo frenta.

32Si ta ún katibu bo tin, trat'é manera ruman,

pasobra e ta mes importante pa bo ku bo mes bida.

33Si bo trat'é malu i e hui bai,

ta unda lo bo bai busk'é?