Sabiduria 14 - Papiamentu Bible with DC 2013(PBDC13)

E vlòt di palu

1Un otro atrobe, ku ke bai hasi un biahe riba laman bai nabegá riba olanan brutu, ta invoká un pida palu ku ta mas frágil ku e barku ku ta karg'é.

2Pasobra gana di hasi negoshi a inventá barku i abilidat di un eksperto kalifiká a konstruyé.

3Pero bo providensia, Tata, ta gui'é, pasobra asta den laman Bo ta habri kaminda i den olanan Bo ta habri un patruli seif,

4demostrando asina, ku Bo por salba hende for di tur kos, di manera ku asta sin saber di barku hende lo por bai nabegá trankil.

5Bo ke pa loke Bo a krea bon, karga bon fruta; p'esei asta na un pida palu chikitu hende ta konfia nan bida: nan ta krusa laman riba un vlòt, yega tera sano i salvo.

6For di den tempu antiguo kaba, tempu e gigantenan orguyoso a muri den diluvio, speransa di mundu, Noe, a buska su refugio riba e arka, i a laga, guiá pa bo man, simia di un humanidat nobo atras pa mundu.

7Bendishoná ta e palu usá korektamente!

27Adorashon di ídolonan ku no tin balor ta orígen i alabes kolmo di tur maldat:

28pasobra esnan ku ta adorá nan ta eksaltá te pèrdè kòntròl i papia lenga misterioso, òf ta biba sin moral, pero no ta laga di hinka dios sí aden na kada okashon,

29pasobra konfiando ku nan diosnan falsu no ta bibu, nan no ta ferwagt ku nan huramentunan falsu por tin konsekuensia ku ta perhudiká nan.

30Tòg kastigu hustu lo baha riba nan pa dos motibu: pasobra dor di adorá diosnan falsu, nan ta pensa robes di Dios, i pasobra, den nan menospresio pa bèrdat i derecho, nan ta hasi huramentu falsu sin pensa.

31No ta pasobra e diosnan falsu ku nan ta hura n'e tin niun klase di poder, sino ku e kastigu ku ta reservá pa pekadónan ta kai semper riba esnan ku ta hasi maldat.