Sirag 37 - Papiamentu Bible with DC 2013(PBDC13)

Amigu òf nò

1Tur amigu ta bisa: ‘Mi ta bo amigu’,

pero tin di nan ku ta pa nòmber so.

2No ta un tristesa ku por mata hende,

si un amigu íntimo kambia bira enemigu?

3O inklinashon pa hasi maldat, fo'i unda bo a bini,

abo ku ta kubri mundu ku engaño?

4Un amigu ta kontentu ora su amigu ta kontentu,

pero ora e ta den pèrtá, e ta bira kontra dje.

5Un kompañero ta kompartí molèster ku su amigu ora ta trata di kuminda,

pero ora di bringa e ta disparsé tras di su eskudo.

6Un amigu di bèrdè bo no mag lubidá nunka

i sigur no ora bo bira riku.

Konsehero òf nò

7Tur konsehero ta elogiá su mes konseho,

pero tin ku ta duna konseho na su mes interes.

8Sea alerta pa hende ku ta duna konseho,

wak promé kiko ta su interes,

por ta ku ta su mes interes e ta buska

i tin mal intenshon ku bo.

9E ta bisa wèl: ‘Bo ta bayendo bon’,

pero e ta hala un banda

pa wak kon bo ta ruiná bo mes.

10No pidi un hende ku ta yalurs riba bo, konseho,

tene bo plannan sekreto pa hende ku ta envidiá bo.

11No diskutí nunka:

ku un muhé ora bo tin idea di buska un konkubina,

ku un kobarde riba guera,

ku un negosiante riba transakshon,

ku un kumpradó riba merkansia,

ku un hende pichiri riba karidat,

ku un hende kurason duru riba gentilesa,

ku un hende floho riba niun sorto di trabou,

ku un trahadó temporal riba un trabou ku ta dura años,

ku un sirbidó pokopoko riba traha duru.

No spera di ningun di e hendenan akí

un konseho ku bo por sigui.

12Nò, mihó bo akudí na un hende religioso,

ku bo sa ku ta kumpli ku e mandamentunan,

un hende di mesun manera di pensa ku bo

i ku ta sinti pa bo ora algu pasa bo.

13Sigui bo mes konsenshi,

e ta bo mihó konsehero.

14Hopi be bo sintimentu ta bisa bo mas

ku shete guardia ku ta vigilá pará na altu.

15I den tur esei, pidi Dios

pa E tene bo riba kaminda di bèrdat.

Instruktor òf nò

16Tur trabou ta kuminsá ku pensamentu promé,

tur akshon ku reflekshon.

17Sintí ta rais di e desishonnan,

ku ta parti nan mes den kuater direkshon:

18bon òf malu, bida òf morto;

pero e poder final den e kaso ei ta palabra tin e.

19Asina tin genio ku ta instruí hopi hende,

pero ku no ta di ningun probecho pa nan mes.

20Palabranan di otro oradó ta pone hende odia nan,

nan no ta haña ni pan seku pa kome.

21Señor no a duna nan e grasia di agradá hende,

nan no tin nada nada di sabiduria.

22Otro tin sabiduria solamente pa nan mes,

i ta nan so tin probecho di e frutanan di nan sabiduria.

23Un sabio di bèrdè ta instruí su pueblo,

por konfia e frutanan di su sabiduria.

24Un sabio ta haña hopi bendishon,

i tur ku mir'é ta gab'é.

25-26Un sabio ta haña apresio serka su pueblo,

su nòmber lo keda biba te den eternidat.

Dianan di hende ta kontá,

pero no por konta e dianan di Israel.

Biba salú

27Mi yu, saminá bo manera di biba,

i determiná loke ta malu pa bo i evitá nan.

28Pasobra no ta tur kos ta bon pa tur hende

ni ta tur hende por kome tur kos.

29No hasi kos di haragan ora bo gusta un kos

ni kome kos dushi di mas;

30pasobra ora bo kome di mas bo ta bira malu

i tur loke bo kome di mas ta wal bo stoma.

31Pa motibu di nan golos hopi a muri,

pero esun ku ta moderá ta alargá su bida.