Sirag 27 - Papiamentu Bible with DC 2013(PBDC13)

1Pa gana plaka hopi hende ta hasi piká,

ambishon pa plaka ta siega hende.

2Meimei di dos piedra por fòrsa un pènchi;

meimei di kompra i benta piká ta pèrta drenta.

3Si un hende no ta firme den su rèspèt pa Señor,

pronto su kas lo ta ruiná.

Palabra di un hende ta mustra su balor

4Sakudí un sefta i bagas ta keda atras,

asina mal pensamentu ta keda atras den sintí di hende.

5Den fòrnu ta tèst kon poronnan ta trahá,

moda di papia di un hende ta reda ken e ta.

6Manera fruta ta demostrá kuido di esun ku a kultiv'é,

asina palabra ta demostrá hende su karakter.

7No gaba un hende promé ku e papia,

pasobra na su papiá bo ta tèst ken e ta.

Bon i mal kompania

8Si bo hasi esfuerso pa hasi bondat lo bo logra

i bistié manera un mantel presioso.

9Paranan ta bini huntu segun nan sorto,

sinseridat ta kompañá esnan ku ta praktik'é.

10Un leon ta drumi lur su víktima p'e atak'é,

asina piká ta drumi lur esnan ku ta kometé inhustisia.

11Loke hende ku ta respetá Señor bisa semper ta bon fundá;

pero hende ku no tin apresio pa Señor parse solo birá:

kada be e ta kambia di idea.

12Den kompania di hende insensato spar bo tempu,

den kompania di hende sensato tuma bo tempu.

13Blablamentu di hende bobo ta sara hende,

i nan moda di hari ta típiko pa pekadó.

14Palabra di hende ku ta hura hopi

ta pone bo kurpa kohe rel;

ora nan ta pleita, mihó bo sera orea.

15Pleitu di hende orguyoso ta trese dramamentu di sanger;

ora nan ta zundra otro bo orea ta hasi due.

Peligernan pa amistat

16Es ku saka sekreto ta pèrdè konfiansa di hende,

nunka e ta haña un bon amigu.

17Stima bo amigu i ked'é fiel,

pero si bo ta saka su sekretonan, bo por bien lubidá.

18Destruí un amistat

ta manera mata un hende.

19Pèrdè un amigu ta manera

laga un para bula bai, sin por koh'é bèk.

20No kore su tras, ya e ta hopi leu kaba;

el a hui sali manera un gasela for di e trampa.

21Por mara un ferbant na un herida,

por pordoná un insulto,

pero esun ku no warda sekreto no tin nada di spera.

Amistat falsu

22Esun ku kinipí wowo tin mal intenshon

i esun ku ripará esei ta bai lag'é.

23Ora bo t'ei e ta kalanchá bo

i aploudí tur loke bo bisa,

pero tras di bo lomba su tono ta kambia

i e ta horka bo ku bo mes palabranan.

24Tin hopi kos ku mi ta detestá, pero e hende ei mas tantu ku tur

i Señor tambe ta detest'é.

Maldat ta kastigá su mes

25Es ku skupi na laria, den su kara e ta kai,

i un sla djatras ta heridá esun ku a propin'é tambe.

26Es ku koba un pos pa otro, e mes ta kai aden

i es ku pone trampa pa otro, su pia mes ta pega aden.

27Ora un hende hasi malu,

e malu ta bini bèk pa e mes,

sin ku e sa di unda e ta bini.

28Hende orguyoso tin pa otro hende solamente despresio i bofon,

pero nan pago ta drumi lur nan manera un leon.

29Esun ku hiba gustu di ruina di un bon hende, lo kai den trampa

i risibí su kastigu fo'i promé ku e muri.

Pordoná i lo bo ta pordoná

30Renkor i rabia tambe ta kosnan horibel,

ta un pekadó so ta keda kana ku nan.