Salmo 47 - Papiamentu Bible with DC 2013(PBDC13)

SALMO 47Dios ta rei riba henter munduPa maestro di kanto. Di yunan di Korag. Salmo.

1Pueblonan tur, bati man,

aklamá Dios ku gritu di legria.

2Esta temibel SEÑOR ta, Esun altísimo,

un gran Rei riba mundu henter!

3El a pone pueblonan bou 'i nos

i a buta nashonnan na nos pia.

4T'É a skohe nos patria pa nos,

nos ta orguyoso di dje,

nos, e pueblo di Yakob ku E ta stima.

5Dios a subi bou di gritu di húbilo,

subi trono ku toká di tròmpèt.

6Kanta salmo pa Dios, toka arpa,

kanta salmo pa nos Rei, kanta p'E!

7Pasobra Dios ta Rei di henter mundu,

kanta p'E ku tur boso saber!

8Dios ta Rei di nashonnan,

E ta sintá riba su trono sagrado.

9Noblesa di pueblonan a uni

ku pueblo di Dios di Abraham;

poderosonan di mundu ta di Dios,

Esun ku ta alsá riba tur.