Job 13 - Papiamentu Bible with DC 2013(PBDC13)

1Komprondé mi bon,

tur loke mi a papia,

ta mi mes wowo a mira,

mi mes orea a tende

i mi a komprondé tur kos bon kla.

2Loke boso sa,

mi tambe sa;

mi no ta inferior na boso.

3Pero mi ke papia ku Dios Todopoderoso,

mi ke pleita mi kaso kara kara kunÉ.

4Sinembargo boso ke blancha mi ku mentira;

boso tur ta manera dòkter,

ku no por kura hende.

5Mare boso por sera boso boka!

Maske t'asina boso por demostrá sabiduria.Job ta kuestioná balor dje testimonionan di su amigunan kontra dje

6Paga tinu kon mi ta bai pleita mi kaso,

kon mi ta bai defendé mi mes.

7No kere ku boso ta yuda Dios o sirbiÉ

ora boso ta gaña hende i kohe nan kabes abou.

8Boso ke tuma parti pa Dios,

boso ke boga p'E?

9Ora E skrudiñá boso,

boso lo por pasa e prueba?

Boso ta kere ku boso por nèk Dios,

manera ta nèk hende?

10E ta skual boso sigur,

manera dos be dos ta kuater,

si boso tuma parti p'E,

akusando ami inhustamente.

11Akaso boso no tin temor di Dios su mahestat,

no ta drenta boso un miedu pa su poder?

12Loke boso ta insistí

ku mi mester aseptá,

lo para bira palabra bashí,

loke boso ta papia

lo resultá palabra fofo.

Job ta dispuesto na enfrentá Dios mes i pleita su kaso

13Hala un banda i keda ketu!

Laga mi papia ku Dios,

kon ku para keda!

14Podisé boso ta pensa:

di kon mi ta bai riska mi bida,

pakiko mi ta bai te final.

15Bon, suponé ku E mata mi,

ku mi no tin niun chèns,

tòg mi ke bai defendé mi inosensia

personalmente serka djE.

16I ata mi konsuelo akí:

Hende sin Dios no ta tribi aserk'É.

17Skucha mi palabranan ku atenshon,

habri boso orea!

18Boso por konta ku mi a prepará mi kaso;

mi tin sigur ku mi inosensia ta keda probá.

19Ken por trese argumentonan sano kontra mi?

Si mi no tin rason,

mi ta dispuesto na keda ku mi boka será,

te dia mi hala mi delaster rosea.

Job ta dirigí su mes na Dios

20Si bo konsedé mi dos petishon,

mi ta presentá bo dilanti, Dios.

21Na promé lugá: stòp di kastigá mi

i na di dos lugá: stòp di spanta mi.

22Papia Abo promé, o Dios,

i ami lo rospondé,

sino laga ami papia

i Abo rospondé mi.

23Bisa mi: kuantu bia mi a peka kontra Bo?

Mustra mi: kua ta mi ofensa i piká?

Ta duel Job ku Dios ta trat'é manera un enemigu

24Pakiko Bo ta trata mi asina seku antó?

Pakiko Bo ke yòp ami, Job, benta leu?

25Mi ta djis un blachi ku a kai fo'i palu,

un sprichi di yerba seku.

Pakiko bo ta sigui yena spantu den mi kurpa;

pakiko Bo ta sigui persiguí mi?

26Bo ta lansa akusashonnan kontra mi,

ku ta amargá mi bida.

Parse ku bo ta pidi mi kuenta i rason

pa pikánan di mi hubentut.

27Bo ta mara mi pia na blòki;

vigilá kada stap ku mi dal,

asta rastro di mi pia Bo ta listra.

28I tur esei Bo ta hasi ku un hende

ku ta garna manera kos putrí,

ta gasta manera paña ku mòt a kome.