Génesis 22 - Papiamentu Bible with DC 2013(PBDC13)

Dios ta pone Abraham na prueba

1Poko tempu despues Dios a pone Abraham na prueba. El a yam'é: ‘Abraham!’ Abraham a kontestá: ‘Ata mi aki.’

2Dios a bis'é: ‘Bai pais Moria ku Isak, bo úniko yu, e yu ku bo stima tantu asina. Ora bo yega aya subi e seru ku Mi indiká bo i ofresé Mi e yu den un sakrifisio di kandela.’

3E siguiente mainta Abraham a lanta trempan sia su buriku. El a kap poko palu pa e sakrifisio i huntu ku Isak i dos di su sirbidónan el a sali bai e lugá ku Dios a bis'é.

4E di tres dia Abraham por a mira e lugá djaleu.

5El a bisa su sirbidónan: ‘Keda aki ku e buriku; ami ku e yu ta bai aya banda; ora nos kaba di adorá Dios nos ta bini bèk.’

6Abraham a pone e palunan ku el a kap pa e sakrifisio di kandela riba lomba di Isak; e mes a bai ku un kuchú i ku poko karbon kayente pa sende e kandela. Asina nan dos a bai.

7Un ratu despues Isak a bisa Abraham: ‘Tata!’ Abraham a kontest'é: ‘Ata mi aki, mi yu.’ Isak a bisa: ‘Nos tin karbon kayente i nos tin palu; pero unda e lamchi pa e sakrifisio di kandela ta?’

8Abraham a kontestá: ‘Dios lo perkurá pa un lamchi pa e sakrifisio, mi yu,’ i nan dos a sigui kana.

9Ora nan a yega e lugá ku Dios a indiká, Abraham a traha un altá i a pone e palunan riba dje. Despues el a mara su yu Isak i a pon'é riba e palunan.Hakobo 2:21

10Nèt ora el a kohe e kuchú pa mata su yu

11Angel di SEÑOR a yam'é: ‘Abraham, Abraham!’ El a kontestá: ‘Ata mi aki!’

12E Angel a bis'é: ‘No hasi e mucha daño, pasobra awor Mi sa ku bo tin rèspèt pa Dios. Bo no a nenga di duna Mi bo úniko yu.’

13Abraham a wak rònt i el a mira un chubatu di karné pegá ku su kachunan den rama di palu. El a kohe e chubatu di karné i a ofres'é komo sakrifisio di kandela na lugá di su yu.Sabiduria 10:5; 1 Makabeonan 2:52; Hebreonan 11:17-19

14Abraham a yama e lugá: SEÑOR ta perkurá pa loke mester. P'esei te ainda e dicho: Riba seru di SEÑOR, SEÑOR ta perkurá pa loke mester.

15For di shelu Angel di SEÑOR a yama Abraham pa di dos bia:

16-17‘Asina SEÑOR ta bisa: “Mi ta hura na Mi mes ku lo Mi bendishoná bo hopi pa loke bo a hasi; bo no a nenga di duna Mi bo úniko yu. Lo Mi hasi bo desendensia mes tantu ku strea na shelu i mes tantu ku santu kantu di laman.Hebreonan 6:13-14; 11:12 Ademas nan lo konkistá e siudatnan di nan enemigunan.

18Huntu ku bo desendensia lo Mi bendishoná tur generashon na mundu, pasobra bo a obedesé Mi.” ’Génesis 12:3; Sirag 44:21; Echonan 3:25; Galatanan 3:8

19Abraham a bai bèk serka su sirbidónan. Huntu nan a bai Beer-Shèba, kaminda Abraham tabata biba.

Desendientenan di Nahor

20Poko tempu despues Abraham a haña notisia ku Milka, kasá di su ruman Nahor, tambe a haña yu hòmber.

21E promé yu tabata Us; despues su ruman Buz, siguí pa Kemuel tata di Aram.

22Despues a nase Kèsèd, Hazo, Pildash, Yidlaf i Betuel.

23Betuel tabata tata di Rebeka. Esakinan ta e ocho yu hòmbernan ku Milka a duna Nahor, ruman hòmber di Abraham.

24Ku su konkubina Reúma tambe Nahor tabatin yu hòmber. Nan tabata Tebag, Gaham, Tahash i Maaka.