Ezekiel 27 - Papiamentu Bible with DC 2013(PBDC13)

Kantika di lamento riba Tiro

1SEÑOR a dirigí palabra na mi:

2‘Hende, kanta un kantika di lamento riba Tiro,

3e siudat situá na kosta ku ta hasi negoshi ku hopi pueblo ku ta biba kantu di laman. Bisa Tiro: Esaki ta loke SEÑOR, mi Dios, ta bisa:

Tiro, bo a pensa:

mi tin bunitesa perfekto.

4Bo teritorio ta meimei di laman;

bo konstruktornan a traha un bunita barku di bo.

5Di pal'i siprès di Senir

a traha bo kurpa,

a buska un pal'i seder for di Libanon

traha bo master for di dje.

6For di pal'i ekel di Bashan

a kòrta bo remanan.

Ku pal'i pino for di Chipre

a forma bo dèk,

un dèk ku mosaiko di ivor.

7Bo belanan tabata di lenen for di Egipto,

bunita bòrdá;

na e kosnan ei por a rekonosé bo.

Bo tènt pa solo tabata di blou püs i kòrá püs,

tela bunita for di kosta di Elisha.

8Bo remadónan tabata bini for di Sidon i Arwad;

bo mes nabegantenan ku eksperensia, Tiro,

tabata na bordo.

9Bo karpinténan di barku,

eksperto i sabí,

tabata bini for di Guebal.

Tur barku grandi ku nan tripulashon tabata den bo haf pa hasi negoshi ku bo.

10Sòldá for di Persia, Lud i Put tabata sirbi den bo ehérsito. Na bo murayanan nan tabata kologá nan eskudo i hèlmu. Ta nan a engrandesé bo fama.

11Hòmbernan for di Arwad i Helèk tabata vigilá bo murayanan, hòmbernan for di Gamad tabata para riba bo torennan. Nan tabata kologá nan eskudo rònt na bo murayanan. Esei tabata hasi bo bunitesa perfekto.

12Tarsis a hasi negoshi ku bo den kantidat di merkansia; el a entregá plata, heru, staña i chumbu a kambio di bo merkansia.

13Habitantenan di Gresia, Tubal i Mèshèk a entregá katibu i opheto di bròns a kambio di bo merkansia.

14Bet-Togarma a entregá kabai di trabou, kabai di monta i mula a kambio di bo produktonan.

15Habitantenan di Rodos a ofresé bo nan merkansia. Riba hopi isla bo a baha bo merkansianan i a laga nan paga bo ku ivor i palu di ébano.

16Aram a hasi negoshi ku bo den kantidat di produkto. A kambio di bo merkansianan nan a entregá bo garnafein, lana kòrá püs, tela bòrdá di koló, lenen, makurá i rubí.

17Huda i e pais Israel a hasi negoshi ku bo; nan a entregá trigo for di Minit, sebada, miel, zeta di oleifi i bálsamo a kambio di bo merkansia.

18Damasko a hasi negoshi ku bo den hopi produkto i tur sorto di merkansia; nan tabata entregá boso biña for di Hèlbon i lana for di Sakar.

19Wedan i Yawan for di e teritorio di Uzal a entregá bo heru, kané i yerba aromátiko a kambio di bo merkansianan.

20Dedan a hasi negoshi ku bo den shabrak.

21Arabia i e hefenan di tribu di Kedar tabata paga pa bo merkansianan ku lamchi, chubat'i karné i chubatu.

22Komersiantenan for di Seba i Rama tabata hasi negoshi ku bo; nan tabata entregá bo e spesereinan di mas fini, piedranan presioso i oro a kambio di bo merkansianan.

23E siudatnan Haran, Kane i Eden, komersiantenan for di Seba, Asiria i Kilmad a hasi negoshi ku bo.

24Nan a hasi negoshi ku bo den pañanan bunita, mantel di lana blou püs i tela fini bòrdá, tapeitnan di hopi koló i kabuya duru iflèktu.

25Barkunan impreshonante tabata transportá bo merkansianan pasa laman.

Tiro, bo tabata manera un barku meimei di laman,

bon kargá, ku karga pisá.

26Bo remadónan a hiba bo laman ganchu,

pero aya, meimei di laman,

un tempestat for di ost a pone bo noufragá.

27Bo tesoronan, bo merkansia,

tur bo merkansia,

bo matrosnan, henter bo tripulashon,

karpinténan di barku i komersiante,

tur sòldá, tur hende na bordo,

tur kos laman hundu ta guli,

e dia ku bo bai pèrdí.

28Habitantenan na kosta ta tembla,

ora nan tende bo matrosnan

grita di miedu.

29Awor tur nabegante ta bandoná nan barku,

remadónan i matrosnan ta bai tera.

30Nan ta keha na bos altu

pa e kos ku a pasa bo;

nan ta ekspresá nan tristesa grandi.

Nan ta pone tera riba nan kabes

i ta lora abou den stòf.

31Pa bo nan ta feita nan kabes limpi

i bisti paña di rou:

nan ta yora pa bo ku tristesa profundo

i nan lamento ta amargo.

32Kehando nan ta kuminsá un kantika di lamento riba bo;

nan ta kanta:

“Ku ken por a kompará Tiro riba laman?

33Ku bo merkansia,

transportá riba laman,

bo a hasi hopi pueblo próspero;

ku bo tesoronan i merkansia

bo a enrikesé hopi rei.

34Pero bo a noufragá,

bo a senk den e awa hundu,

bo merkansia, henter bo tripulashon

laman a guli huntu ku bo.”

35Tur habitante na kosta

ta morto spantá pa bo;

nan reinan ta tembla di miedu,

nan kara a kambia koló.

36Komersiantenan di otro pueblo

ta flùit hasi chèrchè di bo.

Loke ta pasa ku bo ta hororoso,

bo a disparsé, pa semper!’