1Ora boso bai bringa kontra boso enemigunan i boso mira ku nan tin mas kabai, garoshi i sòldá ku boso, no tene miedu di nan, pasobra SEÑOR, boso Dios, ta ku boso, E ku a saka boso for di Egipto.
2Djis promé ku e bataya kuminsá e saserdote mester bai para dilanti i papia asin'akí ku pueblo:
3“Skucha, Israel! Boso ta bai kuminsá bringa kontra boso enemigunan. No pèrdè kurashi, no tene miedu, no drenta pániko, no laga nan desanimá boso,
4pasobra ta SEÑOR, boso Dios, mes ta bai ku boso pa bringa pa boso kontra boso enemigunan i duna boso viktoria.”
5Despues e lidernan mester bisa e pueblo: “Ken a traha un kas i no a bai biba aden ainda? E mag bai kas bèk. Pasobra si e muri den guera, un otro hende ta bai biba den su kas.
6Ken a planta un hòfi di wendrùif i no a kosechá wendrùif for di dje ainda? E mag bai kas bèk. Pasobra si e muri den guera, un otro hende ta kosechá e wendrùifnan.
7I ken ku a komprometé pa kasa pero no ta kasá ainda ku su brùit? E mag bai kas bèk. Pasobra si e muri den guera, un otro hende ta kasa ku e brùit.”
8Finalmente e lidernan mester puntra: “Ken tin miedu? Ken falta kurashi? E mag bai kas bèk. Sino e ta deskurashá e otronan tambe.”
9Ora e lidernan kaba ku nan diskurso na e pueblo, nan mester nombra ofisial riba e trupanan.
10Promé ku boso ataká un siudat, boso mester eksigí un kapitulashon pasífiko.
11Si e habitantenan bai di akuerdo ku esei i habri porta di siudat pa boso, henter e poblashon mester hasi trabou obligatorio pa boso.
12Si nan no kapitulá ma ta preferá guera e ora ei boso mester sitia e siudat.
13SEÑOR, boso Dios, lo entregá nan na boso i boso mester mata tur su hende hòmbernan ku spada.
14E hende muhénan, muchanan i bestia di kria i tur otro kos den e siudat ei boso mag tuma pa boso komo botin. Gosa di nan pasobra ta SEÑOR, boso Dios, ta regalá boso e botin akí.
15Di e manera akí boso mester trata tur e siudatnan ku ta keda pafó di e pais kaminda boso ta bai biba.
16Pero ora ta trata di siudat den e pais ku SEÑOR, boso Dios, ta bai duna boso, boso no mag laga ningun hende keda na bida,
17kaba ku nan kompletamente: hetitanan, amoritanan, kanaanitanan, perizitanan, hiwitanan i yebusitanan, manera SEÑOR, boso Dios, a ordená boso.
18Sino nan ta siña boso praktiká nan aktonan repugnante ku nan ta praktiká na honor di nan diosnan i dor di esei boso lo peka kontra SEÑOR, boso Dios.
19Si boso mester sitia un siudat hopi tempu promé ku boso por okup'é, spar e hòfinan rondó di e siudat ei. Boso por kome di nan, pero no kap nan bash'abou. Ta hende e palunan pafó di siudat ta antó ku boso mester sitia nan tambe?
20Destruí òf kap solamente e palunan ku no ta di fruta. Boso por usa e palunan ei pa traha konstrukshon pa sitia e siudat te ora e kapitulá.
Who We AreWhat We EelieveWhat We Do
2025 by iamachristian.org,Inc All rights reserved.
