Sirag 23 - Papiamentu Bible with DC 2013(PBDC13)

1Señor, Tata i doño di mi bida,

no laga mi lenga dominá mi,

ni laga ku mi ta kai pa su motibu!

2Ken ta pone un karbachi kla

pa suta mi moda di pensa

i e chapara di sabiduria

pa kastigá mi kurason?

E ora ei e karbachi ei lo no spar mi

ora mi kometé bobedat

ni nunka e chapara ei lo no keda sin kastigá

e erornan di mi lepnan,

3pa mi erornan no multipliká

ni mi pikánan oumentá,

pa mi no keda humiliá dilanti di mi enemigunan

ni nan hari mi.

4Señor, Tata i Dios di mi bida,

libra mi bista di miradanan kudisioso

5i kita tur mal deseo fo'i mi.

6No laga deseo karnal òf pashon seksual dominá mi.

No entregá mi na deseonan bergonsoso!

Disiplina ora ta papia

7Yunan, siña disiplina serka mi pa ora boso ta papia;

esun ku tum'é pa kustumber, no ta kai den trampa.

8Pekadó ta bira víktima di su mes boka,

meskos asina kalumniadó i hende orguyoso.

9Huramentu, hasi esei solamente den kasonan eksepshonal;

no malusá e Nòmber Santu.

10Un katibu ku su shon ta kontrolá tur ora bai,

semper tin marka di karbachi;

asina tambe un hende ku tur ora ta hura

i pronunsiá e Nòmber Santu,

semper lo ta kulpabel.

11Esun ku ta hura hopi, ta peka hopi,

kastigu lo bini sigur.

Ora un hende hura sin pensa, e ta kulpabel.

Ora un hende hura sin motibu, e ta dòbel kulpabel.

Ora un hende kometé perhurio, no tin niun sirkunstansia

ku ta suavisá e akto akí, pero e ta haña e kastigu kompleto.

12Tin un manera di papia mas ku ta ekivalente na morto;

ohalá nunka un hende na Israel no pronunsiá e palabranan ei.

Hende ku ta respetá Señor ta keda leu for di kos asina,

nan no ta lora nan mes den piká.

13No kustumbrá papia kos di dòbel sentido,

lo bo hasi piká pa palabra.

14Ora bo ta anda ku hende importante;

no deskuidá hasi algu ku no ta pas

i hasi bo mes ridíkulo dor di papia kos fo'i sla.

Kòrda kon bo mama i bo tata lo a sinti nan!

E ora ei lo bo a deseá di no a nase nunka,

i lo a maldishoná e dia ku bo a nase.

15Esun ku tin kustumber di usa palabra insolente,

nunka di su bida lo bira un hende drechi.

Libertinahe seksual

16Dos tipo di hende ta montoná piká riba piká

i spesial un di tres ta lanta Dios su ira:

17esun ku ta entregá na pashon seksual ku ta kima manera kandela;

e no paga te ora e kaba ku su mes;

esun ku ta kometé insesto;

ta te ora e kandela paga e ta stòp;

esun ku ta kibra matrimonio, pa ken tur pan ta dushi;

e no ta kansa te ora e ta morto.

18Un hòmber ku ta infiel na su kasá

ta bisa den su mes: ‘Ken ta mira mi?

Tur kos ta skur, e murayanan ta skonde mi,

niun hende no ta mira mi.

Di kiko lo mi tin miedu?

Altísimo lo no rekordá mi pikánan.’

19Loke e tin miedu di dje ta bista di hende

i e no ta realisá ku wowo di Señor

ta dies mil bia mas kla ku solo:

E ta weta tur loke hende ta hasi

i E ta penetrá te den hukinan skondí.

20Promé ku El a krea tur kos,

ya Dios tabata konosé nan,

i asina tambe despues ku El a terminá nan.

21Un hòmber ku kometé adulterio

ta keda atrapá ora ménos e ta ferwagt

i lo e risibí su kastigu públikamente.

Kibradó di matrimonio

22Meskos tambe ta sosodé ku e muhé ku ta infiel na su kasá

i ta dun'é un heredero ku no ta di dje.

23Na promé lugá e tabata desobedesidu na Lei di Altísimo;

na di dos lugá el a komportá malu ku su kasá;

na di tres lugá el a kometé aktonan inmoral i a kibra matrimonio

i a haña yu ku no ta yu di su kasá.

24Mester hiba e muhé ei dilanti di asamblea

i konsekuensia di su falta lo kai riba su yunan.

25Su yunan lo no tira rais

i su takinan lo no karga fruta.

26Su rekuerdo lo ta un maldishon

i su bèrgwensa lo no kita nunka.

27I esnan ku keda na bida lo rekonosé

ku no tin nada mihó ku respetá Señor

ni nada mas dushi ku kumpli ku su mandamentunan.