Isaías 47 - Papiamentu Bible with DC 2013(PBDC13)

Kaida di Babilonia

1SEÑOR ta bisa:

‘Baha fo'i bo trono, Bábel, dams fini!

Kai sint'abou na suela den tera,

yu muhé di babilonionan!

Bo a karga nòmber di suave i delikado

pero esei a pasa pa historia.

2Ban mira,

kohe piedra di mulina i mula trigo!

Kita belo, kita kola,

hisa bo saya

pa bo kana pasa riunan.

3Lo bo para sunú den bista di hende

i tur lo mira bo bèrgwensa.

Mi ta bai tuma vengansa riba bo,

no tin hende pa stòp Mi.’

4Esaki ta palabranan di Esun ku ta sali pa su pueblo,

su nòmber ta SEÑOR soberano,

Dios Santu di Israel.

5‘Kai sinta i keda ketu,

yu muhé di babilonionan,

bai skonde den skuridat,

pasobra bo n' tin e título

“Soberana di hopi reino” mas.

6Mi tabata rabiá ku mi pueblo,

Mi no a konsider'é di Mi mas.

M'a entreg'é den bo man.

Pero abo no ta'tin kompashon,

ni sikiera ku hende bieu,

bo yugo tabata pisa nan.

7B'a pensa: “Soberano mi ta

i soberano mi ta keda!”

Bo n' tuma mi atvertensianan na pechu,

bo n' kòrda riba e konsekuensianan.

8Anto awor, habri orea, muhé rechá,

abo, asina sigur di bo mes,

k'a pensa: “No tin manera mi,

ami sí no ta keda biuda,

ami sí n' ta pèrdè mi yunan!”

9Pero t'esei mes lo pasa bo.

Diripiente, riba un solo dia,

bo ta bira biuda,

bo ta pèrdè bo yunan.

E desgrasia akí lo kai ku tur su peso riba bo.

Ni maske kuantu fórmula mágiko bo usa,

ni maske kuantu bruha bo hasi,

maske kon fuerte nan ta,

nan no ta yuda bo.

10Bo tabata pone konfiansa den bo fechorianan;

bo tabata pensa den bo mes:

“Niun hende n' ta mira!”

Bo ta baké den kos malu,

bo sa bon di nan;

t'esei a pone bo bruha

i bisa den bo mes: “Bas mi ta!”

11Pero un desgrasia lo bini riba bo,

ni ku tur bo kenshinan di bruheria

bo no ta logra evit'é.

Un desaster lo baha riba bo,

i bo n' por bira su rumbo.

Un katástrofe lo alkansá bo

i bo n' por premir'é.

12Sigui numa ku bo práktika di bruheria

i bo kuantioso fórmulanan mágiko.

Fo'i bo mucha bo ta laba den nan.

Podisé nan por pone bo logra algu

i manda desaster kore bai!

13Bo a kansa bo kurpa konsultando astrólogonan.

Wèl, laga nan presentá awor i bin salba bo,

esnan ku ta parti shelu den zona,

opservá streanan

i predesí di luna pa luna

loke ta bai sosodé!

14Mira akí, kabit'i pal'i maishi nan ta!

Kandela lo kima nan,

sin nan logra sali fo'i dje vlamnan.

I lo n' ta un kandela chikí di karbon

pa keinta kurpa n'e,

ni tampoko un kandela dushi

pa sinta su dilanti.

15Tur e hendenan ei ku b'a atendé kuné,

trafiká kuné fo'i den bo hubentut:

ki bo tin na nan?

Nan ta dualu bai, un pa un

kada un den su mes direkshon

i niun no por salba bo.’