Sirag 39 - Papiamentu Bible with DC 2013(PBDC13)

1Esta distinto ta e hende ku ta dediká su mes

kompletamente na studia lei di Altísimo!

E ta profundisá su mes den sabiduria di tradishon

i okupá su mes ku palabranan di profetanan.

2E ta apsorbé loke hòmbernan sélebre a deklará

i penetrá den profundidat di proverbionan.

3E ta investigá nifikashon skondí di proverbionan,

i ta bon den dichonan misterioso.

4E ta sirbi hende importante

i presentá dilanti di prínsipenan.

E ta biaha bai paisnan di pueblonan strañero,

pa haña eksperensia di loke ta bon i malu serka hende.

5Ku alma i kurpa e ta buska fo'i mainta trempan

Señor ku a kre'é

i ta hasi orashon dilanti di Altísimo.

E ta habri su boka pa resa

i ta sklama pa pordon di su pikánan.

6Si Señor poderoso ke

E ta yen'é ku spiritu di inteligensia,

E ta laga palabranan di sabiduria flui

i den su orashon e ta gradisí Señor.

7E tin un komprondementu zùiver i su mira ta bon

i ta buska pa sa Dios su misterionan.

8E ta iluminá otro ku e enseñansa ku e mes a haña,

tur su orguyo ta den duna splikashon di santa Skritura.

9Hopi hende ta gaba su komprondementu

i lo no lubid'é hamas.

Su rekuerdo no ta bai pèrdí nunka,

su nòmber lo biba di generashon pa generashon.

10Pueblonan lo papia di su sabiduria

i komunidat lo proklamá su fama.

11Si e biba largu, su nòmber ta surpasá nòmber di mil

i ora e bai sosegá pa semper, e por ta satisfecho.

PREGUNTANAN GRANDI DI BIDAElogio di Dios su providensiaPreludio

12Mi ke ekspresá algu mas di mi pensamentunan:

mi ta yen manera luna yen.

13Skucha mi, boso, yunan deboto,

krese bai laria manera rosa plantá kant'i awa.

14Plama holó di perfume manera sensia

i floria manera leli;

alsa bo stèm i kanta den koro

i bendishoná Señor pa tur su obranan.

15Proklamá grandesa di su nòmber,

yam'É danki i alab'É

ku tur sorto di kantika i muzik di arpa.

Alab'É ku e palabranan akí:

Himno riba Dios su providensia

16Tur Señor su obranan ta mashá mashá bon,

tur loke El a destiná ta sosodé na su tempu.

No mester puntra: ‘Ta pakiko esaki òf esaya ta bon?’

Pasobra tur kos ta sirbi na su debido tempu.

17El a papia i awa a hala huntu,

i riba su palabra awa a yena dam.

18Riba su òrdu ta sosodé loke E ke,

i ora E yuda niun hende no por stroba.

19E ta mira loke hende ta hasi,

niun hende no por skonde pa su bista.

20Tur kos E ta tene bon na bista,

for di e promé prinsipio te na e delaster fin;

nada no ta straño p'E.

21P'esei no mester puntra: ‘Pakiko esaki òf esaya ta bon?’

Pasobra tur loke El a krea tin su pakiko.

22Su bendishon ta kubri tera seku manera un riu,

inund'é manera Nilo.

23Pero e pueblonan lo sinti su Ira,

manera tempu El a kambia awa dushi den awa salu.

24Su kamindanan ta lizu pa debotonan,

pero pa pekadónan nan ta yen di estorbo.

25For di prinsipio El a destiná kos bon pa bon hende

i kos malu pa mal hende.

26E promé nesesidatnan di bida ta

awa, kandela, heru, salu i hariña di trigo,

lechi, miel, biña,

zeta di oleifi i paña di bisti:

27tur e kosnan akí ta benefisio pa bon hende,

pero pa mal hende nan ta resultá malu.

28Tin bientu ku Dios a krea pa kastigá,

den nan rabia ta bati nan ta bati;

ora nan ora yega nan ta lòs laga nan forsa bai

i satisfasé ira di nan Kreador.

29Kandela, pipita di eis, hamber i pèst:

tur esakinan ta bini pa kastigá;

30djentenan di bestia feros,

skarpion i kolebra

i e spada vengadó ku ta kaba ku esnan ku ta pekadó,

31ku alegria nan ta kumpli ku su òrdu.

P'E nan ta para kla na mundu

te ora nan ora yega;

e ora ei sin faya nan ta kumpli ku loke E ta deseá.

32P'esei mi ta pone riba papel

loke mi a sinta pensa

i semper kaba tabata mi konvikshon:

33tur loke Dios a hasi ta bon

i na nan debido tempu E ta sòru pa tur loke tin mester.

34No por bisa: Esaki ta pió ku esaya,

pasobra tur kos tin su balor na su debido tempu.

35Kanta anto di henter boso kurason

i bendishoná nòmber di Dios Santu.