Sirag 18 - Papiamentu Bible with DC 2013(PBDC13)

Kreador

1Dios ku ta biba eternamente

a krea universo;

2ta Señor so ta intachabel.

4Niun hende no por kaba di konta loke El a hasi;

ken lo por investigá su maravianan?

5Ken lo por midi su forsa inmenso,

òf eksponé su bondat?

6No ta posibel oumentá nan ni hasi nan ménos,

ningun hende no por skrudiñá Señor.

7Ora un hende pensa ku el a kaba,

ta e ora ei numa e ta kuminsá;

ora e pone su pèn un banda,

ainda e ta keda ku e misterio.

8Kiko hende ta? Pakiko e ta sirbi?

Kiko e bon i e maldat ku e hasi ta nifiká?

9Si un hende biba largu, e por hasi shen aña;

10pero kompará ku eternidat,

e poko añanan ei ta manera un gota di awa den laman,

manera un pipita di santu.

11P'esei Dios tin pasenshi ku hende

i E tin mashá kompashon ku nan.

12E sa kon mizerabel fin di hende ta,

p'esei E ta generoso ku su pordon.

13Hende ta tene kompashon solamente ku otro hende,

pero Señor ta tene kompashon ku tur ser bibu;

E ta hala hende su orea, instruí, siña

i manera un wardadó di karné

E ta hiba su karnénan bèk.

14E tin kompashon ku esnan ku ta aseptá instrukshon

i ku zelo ta sigui su leinan.

ATENSHON, UN BON KARAKTERÍSTIKAOra bo duna

15Mi yu, ora bo duna, duna sin kik,

no laga palabranan ofensivo kompañá un regalo.

16Manera serena ta refreská dianan di kalor,

asina bon palabra ta mihó ku regalo.

17Enberdat un palabra ta mihó ku un regalo

i hende atento ta duna tur dos.

18Un kèns ta ofendé hende ku su palabranan sin sintimentu,

un regalo ku no ta duná di kurason no ta hasi niun hende kontentu.

Ora bo hasi promesa

19Promé bo papia, sòru pa bo sa kiko bo ta bai bisa;

promé bo bira malu, kuida bo salú.

20Saminá bo konsenshi, promé ku Dios bin pidi bo kuenta i rason;

ora e momento yega, lo bo haña pordon.

21Baha kabes pa Dios, promé bo bira malu,

i si tòg kos a bai malu, mustra mesora ku ta duel bo.

22No laga nada stroba bo di kumpli na tempu ku un promesa

i no warda te ora bo ta bai muri pa regla bo asuntunan.

23Promé bo hasi un promesa na Dios pensa bo bon;

i no bira hende ku ta pone Señor na prueba!

24Kòrda riba Dios su ira dia di huisio final,

e ora di kastigu, ora Dios lo kita su kara.

Ora tin peliger

25Ora bo tin sufisiente, hamber por bin bati na porta.

Ora bo ta riku, pobresa i mizeria por bin bati na porta.

26Den un drumi lanta hopi kos por kambia,

si Señor ke, tur kos ta sosodé den un frega 'i wowo.

27Un sabio ta alerta tur ora;

ora di maldat e ta keda leu.

28Tur ku tin sano huisio ta rekonosé sabiduria

i ta duna homenahe na esun ku nan ripará ku tin e.

29Esnan ku ta papia na un manera sensato

mes a pensa bon promé

i awor nan por pasa pa otro

un avalancha di palabra ku ta toka hende.

Dominio propio

30No laga pashon lastra bo bai kuné,

dominá bo deseonan.

31Si bo keda sin frena bo pashon,

bo enemigunan ta hari bo.

32No buska plaser den paranda,

e gastunan lo por ruiná bo.

33Si bo no tin sèn den bo pòtmòni,

no hasi fiesta ku plaka fiá

pa bo no haña bo ta bira pididó di limosna.