Sirag 5 - Papiamentu Bible with DC 2013(PBDC13)

Seguridat falsu

1No stèns riba bo rikesa

ni bisa: ‘Mi n' tin mester di ningun hende!’

2No laga kapricho i deseo dominá bo

pa bo sigui pashonnan di bo kurason.

3No bisa: ‘Mi ta doño di mi mes kurpa’,

pasobra sigur Señor ta kastigá bo pa esei.

4No bisa: ‘Mi a peka i tòg nada no a pasa mi’,

pasobra esei ta pa motibu ku Señor tin hopi pasenshi.

5No stèns muchu riba pordon

ni montoná piká riba piká.

6I no bisa: ‘Señor su kompashon ta mashá grandi,

l'E pordoná e kantidat di piká ku mi a hasi’;

pasobra Señor ta un Dios di piedat i di rabia, tur dos,

i pekadónan ta sinti e peso di su pago.

7No tarda pa bolbe serka Señor,

ni posponé pa mañan;

pasobra Señor su rabia lo baha di gòlpi

i lo E destruí bo ora di duna kuenta.

8No stèns riba rikesa mal ganá,

lo e no yuda bo ku nada dia di kastigu.Sinseridat

9No tene awa den un man, kandela den e otro,

no afiliá na tur grupo,

esei ta kos di hende sin karakter.

10Keda ku bo opinion,

sòru pa ta hende di ún palabra.

11Skucha lihé,

ma tuma tempu pa kontestá.

12Ora bo sa algu bon, kompartié,

di otro manera keda ketu.

13Di papiamentu ta bini tantu honor komo bèrgwensa

i lenga ta kaba ku hende.

14No papia malu di hende,

no kalumniá hende ku bo lenga,

pasobra e kalumniadó mes ta kosechá bèrgwensa,

e despresio di mas grandi ta warda e sakadó di mentira.

15No hasi niun sorto di ko'i falsu, ni grandi, ni chikí!