Sirag 48 - Papiamentu Bible with DC 2013(PBDC13)

Elías

1Elías a aparesé, un profeta manera kandela,

su palabra ardiente manera un flambeu.

2El a trese hamber riba yunan di Israel,

den su zelo el a redusí nan kantidat hasié tiki.

3Pa palabra di Señor el a pone ku awa no tabata kai,

tres be el a laga kandela baha.

4Esta teribel bo tabata, Elías!

No tin niun mes glorioso ku bo!

5Bo a lanta un hende for di morto,

sak'é for di reino di morto pa palabra di Altísimo.

6Bo a hiba reinan na ruina fatal,

prominentenan bo a laga muri den nan kama.

7Riba Sinai bo a tende veredikto di Dios,

riba Horeb su sentensia di vengansa.

8Bo a konsagrá reinan pa venga maldat

i un profeta komo bo siguidó.

9A hisa bo na shelu den un warwarú,

den un garoshi ku kabainan di kandela.

10Di bo ta skibí ku bo ta para kla pa e tempu stipulá,

pa plakia ira di Dios promé ku e plama,

pa trese pas entre tatanan i yunan

i restourá tribunan di Israel.

11Dichoso ta esun ku mira bo promé ku e muri,

i mas dichoso t'abo ku ta na bida ainda.Eliseo

12Dia Elías a disparsé den un warwarú,

Eliseo a keda yená ku su spiritu.

Durante su bida e no tabatin miedu di niun hende

ni niun no tabatin poder riba dje.

13Nada no tabata difísil p'e,

un morto a resusitá ora el a drumi riba dje.

14Na bida e tabata hasi milager

i despues di su morto tambe, su obranan tabata atmirabel.

15Apesar di tur e kosnan ei e pueblo no a kombertí,

nan no a stòp di hasi piká,

te dia a lastra nan saka for di nan pais

i plama nan rònt mundu.

Rei Ezekías

16No a keda nada mas ku un pueblo chikí

ku un rei di kas di David.

Algun di nan a hiba un bida korekto,

otronan a kometé delitonan grandi.

17Ezekías a reforsá su kapital,

lagando awa drenta paden di su murayanan.

El a bora barankanan ku heru

i koba tanki den baranka pa warda awa.

18Ten 'i su ten, Sanherib a lansa un atake

i manda un ofisial altu di su ehérsito,

ku a invadí e siudat Sion

i ofendé Dios den su soberbia.

19E ora ei kurason i mannan a kuminsá tembla,

nan a trose di doló manera muhé na parto;

20nan a sklama na Dios mizerikordioso,

miéntras nan tabata alsa nan mannan n'E.

E Santu den shelu a skucha nan lihé

i a libra nan pa man di Isaías.

21El a vense e ehérsito asirio

i su angel a destruí nan.

Profeta Isaías

22Ezekías a hasi loke ta agradá Señor.

El a sigui firmemente e kaminda di su tata David,

ku Isaías, e profeta grandi i fiel,

a mustr'é pa medio di su vishonnan.

23P'esei ten 'i su ten solo a hala atras

i a alargá bida di rei.

24Dor di su spiritu poderoso, Isaías a mira futuro

i a konsolá e habitantenan di Sion ku tabata tristu;

25el a anunsiá loke tabata bai pasa

te leu aya den futuro

i promé ku e kosnan sosodé

el a pronostiká loke ainda tabata skondí.