Éksodo 26 - Papiamentu Bible with DC 2013(PBDC13)

E tènt sagrado

1Traha dies pida paña pa mi tènt sagrado. E pañanan mester ta di lana blou, kòrá püs i kòrá bibu, ku lenen fini, trahá di hilu trosé den otro. Laga un eksperto traha figura di kerubin den e paña.

2E pida pañanan mester ta mes pareu: kada pida mester ta dieskuater meter largu i dos meter hanchu.

3Pega nan sinku sinku na otro hasi di nan dos paña.

4-5Traha na un banda di kada di e dos pañanan sinkuenta las di lana blou. Traha nan di tal manera ku nan ta keda enfrente di otro.

6Traha sinkuenta hak di oro i pega e dos pidanan na otro, di manera ku e tènt ta bira ún hinté.

7Traha riba e tènt sagrado un otro tènt, ku lo konsistí di diesun pida paña, trahá di lana di kabritu.

8E diesun pidanan mester ta mes pareu: diessinku meter largu i dos meter hanchu.

9Pega nan na otro hasi dos paña di nan, un di sinku pida i un di seis pida. Dobla e di seis pida, lag'é kologá na e parti dilanti di e tènt.

10Traha na un banda di kada di e dos pañanan sinkuenta las i

11pasa sinkuenta hak di bròns den nan di manera ku e dos pañanan ta bira ún hinté.

12Komo e paña di e tènt akí ta mas largu, laga mitar di loke ta sobra den largura keda kologá na e parti patras di e tènt sagrado.

13Ora tapa e bandanan di e tènt sagrado lo sobra sinkuenta sèntimeter den hanchura, na kada banda.

14Tapa e di dos tènt promé ku kueru di chubatu di karné, tinzjí kòrá, i despues ku kueru fini.

15Traha e muraya di e santuario di tabla di palu di akasia, pone e tablanan pará.

16Nan mester ta sinku meter largu i setentisinku sèntimeter hanchu.

17Kada tabla mester tin dos pènchi pa por pega nan na otro.

18Pa e banda zùit mester di binti tabla.

19Pone bou di e binti tablanan kuarenta pia di plata, pa kada tabla dos pia kaminda e dos pènchinan por drenta.

20Pa e otro banda, esta banda nort, tambe binti tabla ku

21kuarenta pia di plata. Dos pia bou di kada tabla.

22Usa pa e banda patras, esta banda wèst, seis tabla

23i pa e skinanan parti patras dos tabla mas.

24E dos tablanan akí ta kore presis pareu di abou te ariba na e promé renchi.

25Pa henter e muraya di patras mester anto di ocho tabla ku diesseis pia di plata, dos bou di kada tabla.

26-27Traha tambe balki di palu di akasia pa tene e tablanan na otro. Pone e balkinan duars riba e tres murayanan di tabla: sinku balki na banda nort, sinku balki na banda zùit i sinku balki patras na banda wèst.

28Mester pone e balki di meimei di kada muraya presis na mitar di e tablanan. E balki akí mester ta hinté.

29Mester pasa e balkinan dor di renchinan di oro ku tin pegá na e tablanan. Fura e tabla- i balkinan tambe ku oro.

30Lanta e santuario, segun e modelo ku Mi a mustra bo aki riba seru.

31Pa separá un parti di e tènt usa un kortina; e mester ta di lana blou, kòrá püs i kòrá bibu, ku lenen fini, trahá di hilu trosé den otro. Laga un eksperto traha figura di kerubin den e kortina.

32Pasa e kortina ei na e haknan di oro ku tin na kuater pilá. E pilánan mester ta di palu di akasia furá ku oro i pegá riba kuater pia di plata.

33Despues di pega e kortina na e haknan mester pone e arka di aliansa ku e tablanan di piedra aden patras di e kortina. E kortina ta separá e parti santu for di e lugá santísimo.Hebreonan 6:19; 9:3-5

34Despues ta pone e tapa riba e arka di aliansa den e lugá santísimo.

35Pone e mesa na e otro banda di e kortina den e parti nort di e santuario i e kandelar den e parti zùit enfrente di e mesa.

36Kologá na entrada di e tènt un kortina di lana koló blou, kòrá püs i kòrá bibu i di lenen fini bunita bòrdá ku hilu di diferente koló.

37Pega e kortina na sinku pilá di palu di akasia. E pilánan mester ta furá ku oro, tin hak di oro i mester ta pará riba pia di bròns.