1SEÑOR, skucha mi, kontestá mi,
pasobra mi ta pober, sin amparo!
2Warda mi, mi ta bo amigu,
Abo, mi Dios, salba mi,
bo sirbidó ta konfia den Bo.
3Tene piedat di mi, Señor,
henter dia mi ta sklama na Bo!
4Duna bo sirbiente alegria,
ya ku ta na Bo mi ta alsa mi alma.
5Bo ta bon, Señor, i kla pa pordoná,
yen di klemensia pa esnan ku ta invoká Bo.
6SEÑOR, skucha mi orashon,
paga tinu na mi gritu di ousilio!
7Den mi ansha mi ta grita yama Bo,
pasobra Abo lo tende mi sigur.
8Denter di diosnan, Señor,
no tin ningun manera Bo,
sin igual ta tur obra ku B'a hasi.
9Tur pueblo ku B'a traha lo bini
pa adorá den bo presensia, Señor,
i duna homenahe na bo nòmber:
10‘Grandi Bo ta, hasidó di milager,
Abo, Dios, Abo so!’
11Mustra mi bo kaminda, SEÑOR,
pa mi andá sea konforme bo bèrdat;
dirigí mi kurason na ún kos so:
rèspèt, sin basilá, pa bo nòmber.
12Di henter mi kurason, Señor mi Dios,
lo mi duna Bo alabansa
i kanta gloria di bo nòmber pa semper.
13Pasobra grandi bo klemensia ta pa mi,
i B'a salba mi dje abismo profundo.
14Dios, insolentenan a lanta kontra mi,
un kuèrdè di burdugu ke mata mi,
nan no ta tene kuenta ku Bo.
15Ma Abo, Señor, ta un Dios
di ternura i gran mizerikòrdia,
yen di pasenshi, bondadoso i fiel.
16Drei mira mi i tene kompashon,
konsedé bo sirbidó bo fortalesa,
salba e yu di bo sirbiente!
17Duna mi un prueba kla di bo bondat,
pa esnan ku ta odia mi por mira,
ku nan kara tur na bèrgwensa,
ku t'Abo, SEÑOR, a yuda mi i konsolá mi.
Who We AreWhat We EelieveWhat We Do
2025 by iamachristian.org,Inc All rights reserved.
